Vodacom yi Hatlisisa Timhaka ta Digitali

Hi Dunisani Ntsanwisi

Khamphani ya Vodacom eka Xifundzhankulu xa Limpopo, yi tivisile hi vuvekisi bya nkoka swinene hi ku vekisa ku tlula R500 wa timiliyoni eka timhaka ta vumhaki bya tinetiweke eka lembe-ximali ra 2026. Leswi swi landzela ku tinyiketela loku ku veke kona lembe leri hundzeke byo vekisa kwalomu ka R414 wa timiliyoni, vuvekisi bya sweswi byi tiyisisa ku tinyiketela ka Vodacom ku tlakusa tindhawu ta vaaki na ku kondletela ku kula ka ikhonomi ya xifundzhankulu, hi ku tirhisa vuhlanganisi bya broadband. Mali leyi yi nga ta tirhisiwa lembe leri yi endla leswaku mali yi fika kwalomu ka R3.1 wa tibiliyoni eka vumaki bya swiyanimoya xikan’we na vuhlanganisi eka malembe ya nkombo eka xifundzhankulu xa Limpopo ntsena.

  “Eka Vodavom, xivono xa hina i ku hlanganisa munhu na tindhawu hinkwato, ku tiyisisa leswaku un’wana na un’wana u na nkateko wo tinghenelerisa eka ikhonomi ya digitali xikan’we na ntshovela wa mbuyelo wa ikhonomi ya vaaki loku ku fambelanaka. Hi ku vekisa eka vumaki bya netiweke ya xiyimo xa le henhla xikan’we na swintshuxo swa vukurhokeri bya digitali lebyi byi fikelelekaka, hi simeka phuphu ra vumundzuku byo vangama, lebyi byi katsaka mani na mani,” ku vula Lynn Benjamin, Mufambisinkulu wa Vodacom eLimpopo.

 Eka vuvekisi hinkwabyo bya lembe-ximali ra 2026, ku tlula R312 wa timiliyoni yi kongomisiwile eka vukhorhokeri bya netiweke ya xiyanimoya, laha ku kunguhatiweke ku vekisa kwalomu ka R346 wa timiliyoni lembe leri taka. Kasi vuvekisi eka vumaki bya vuhlanganisi byi ta kuma kwalomu ka R194.2 wa timiliyoni eka lembe leri, leswi swi nga ta seketela ku tlakusiwa ka vufikeleri na ku antswisa ka vuswikoti bya netiweke. Migingiriko ya Vodacom yo yisa emahlweni thekinoloji ya ximanguvalawa leyi yi antswisiweke, laha yi katsaka 4G na 5G, naswona yi ta fikelela tindhawu ta le madorobeni na le xivindzini xa le matikoxikaya exifundzheninkulu, leswi swi tisaka ndlela yintshwa ya vuhlanganisi bya netiweke yo hatlisa eka tindhawu leti ti nga le makorhweni eLimpopo

Tanihi xiphemu xo endla migingiriko leyi, xifundzhankulu xi ta va xi endla kwalomu ka ku tlula 250 wa tindhawu ta 5G ePolokwane, Makhado, Thohoyandou, Matikoxikaya ya le Makhuduthamaga, Tubatse, Matikoxikaya ya le Thulamela, Matikoxikaya ya le Ba-Phalaborwa xikan’we na le Matikoxikaya ya le Tzaneen, eka tin’wana. Ku nyika vuhlanganisi bya netiweke eka vanhu lava va tshamaka ematikoxikaya hi leswi Vodacom yi tinyiketeleke swona ku ndlandlamuxa netiweke eka vanhu lava va tshamaka exivindzini xa le matikoxikaya eka xifundzhankulu xa hina. Leswi hi swona swi endlaka leswaku xifundzhankulu xi endla tindhawu tintshwa ku hlanganisa tindhawu leti ti nga se hlanganisiwaka to fana na Giyani, Malamulele, Musina, na tin’wana to tala leti ti kumekaka ematikoxikaya lama ma kumekaka emaninginingini ya n’walungu wa xifundzhankulu.

Ehenhla ka ku engetela vuhlanganisi bya netiweke, Vodacom yi tinyiketerile ku seketela mabindzu ya vaaki. Xifundzhankulu xi vekile kwalomu ka R40.3 wa timiliyoni ya mabindzu lamantsongo (SMME) hi lembe-ximali ra 2024 ku fika eka 2026, ku tiyisisa vuswikoti bya digitali eLimpopo xikan’we na ku kondletela nhluvukiso wa ikhonomi ya vaaki leswi swi nga na nkoka eka ku tumbuluxa mitirho eka xifundzhankulu hinkwaxo.

Lexi xi nga na nkoka eka makungu ya Vodacom eLimpopo i ku fikeleriwa ka switirhisiwa swa 4G+ hiku angarhela xikan’we na vuhlanganisi lebyi byi fikelelekaka. Ku tinyiketela ka khamphani ku ya eka switirhisiwa leswi swi kombisiwile eka migingiriko ya yona yo engetela ku nghenisiwa eka tiqingo ta ximanguvalawa. Eka malembe lama hundzeke, nhlayo ya tikhasimende leti ti tirhisaka switirhisiwa swa 4G na 5G yi tlakukile hi 9% wa mikutlunya.

Ku hatlisisa maendlelo lawa, Vodacom yi tivisile EasyToOwn, lexi ku nga xitirhisiwa lexi xi endlaka leswaku tikhasimende ti xava riqingo ra ximanguvalawa kusukela eka R6.50 hi siku hi ku tirhisa airtime. Kusukela loko yi simekiwile hi 2023, EasyToOwn yi fikelerile ku kula hi kwalomu ka 113%, leswi swi kombiseke ku laveka swinene eka switirhisiwa swa digitali. Tanihi pfhumba ra sweswi ra Mandela, Vodacom yi nyikile tiqingo ta ximanguvalawa ta 4G eka tikhasimende ta 2G hi ntsengo wa R67 (leswi swi koxaka R700 emavhengeleni) leswi ku nga ku yisa emahlweni ku katsa vanhu eka timhaka ta digitali.

Ku tinyiketela ka Vodacom eLimpopo eka ku fikeleleka swi tlhela swi ya na le ka mixavo ya data. Lembe leri hundzeke, mixavo ya tibandlili ta data yi enhlisiwile hi kwalomu ka 30%, ngopfu-ngopfu hikokwalaho ka tikhasimende leti ti ngheneke eka switirhisiwa leswi swi endliwaka ku ya hi munhu leswi swi kombisaka mixavo ya kahle swinene eka xifundzhankulu. Mapfhumba ya dyondzo ya tisile ku tlakuka ka 11% lembe na lembe leswaku tikhasimende ti fikelela switirhisiwa leswi, ku tiyisisa leswaku vaaki va vuyeriwa eka vuhlanganisi lebyi byi fikelelekaka.

 “Ku tinyiketela ka hina loku ku ya ka emahlweni ku katsa mani na mani eka timhaka ta digitali i swikulu kutlula timhaka ta thekinoloji, swi kona ku tlakusa vanhu, ku kondletela ku kula, xikan’we na ku aka xifundzhankulu laha ku nga siyiwiki munhu ehandle. Hi ri kun’we, hi hlanganisa Limpopo ku ya eka vumundzuku byo antswa,” Benjamin wa gimeta.