RENDZO RA METROBEATZ RSA
Hi Pilot Manganyi
Kusuka emugangeni wo rhula wa ka Khakhala, ehansi ka doroba ra Giyani, jaha leri a ri ri na xivono ri sungurile ku endla marimba hi riqingho ra le nyongeni ri ri na malembe ya le hansi swinene. Bongani Mossetia Macebele, loyi sweswi a tivekaka hi vito ra Metrobeatz RSA, namuntlha u tiveka tanihi nqambhi ya xiyimo xa le henhla, kambe rendzo ra yena ri sungurile a nga se tiva swo tala ehandle ko va na xivono xa ku va nqambhi.
Loko a ri na malembe ya nkaye, Metrobeatz RSA a sungurile ku endla marimba hi riqingho ra yena, a ri karhi a dyondza mipfumawulo ya marimba loko titangha ta yena ti ri karhi ti tlanga bolo. Malume wa yena Makuhani, u hatlile a vona ku hambana eka ntukulu wa yena Metro na van’wana vana. Loko a twa marimba lawa ntukulu wa yena a ma tlanga, u kotile ku lemuka leswaku u na nyiko leyi xaka bya dyambu ra ximumu emahlweni ka yena. Tanihiloko malume wa yena a tiyimiserile ku n’wi humelerisa, u n’wi tekile a n’wi nyikela emavokweni ya Penny Penny.
Metrobeatz RSA u nghenelerile xivandla xa vunqambhi ximfumo loko a ri na malembe ya khume mune (14), laha a nga va muhumelerisi, xikan’we muchayi wa marimba eka alibamu ya Penny Penny. Kusuka kwalaho, nyiko ya yena yi ndlandlamukile swa xitshuketani, loko a fikisa khume tsevu (16) wa malembe, se a sungurile ku chayela na tin’wana tinqambhi ta le matikweni mambe tanihi Zimbabwe, Baba Harare, na Mozambique, Queen Vosho. “Penny Penny u tlangile xiave xikulu eku ndlandlamuxeni ka nyiko na maambalelo ya Metrobeatz, a tshamela ro n’wu byela leswaku u fanerile a dyondza ku tiyimela” ku boxa mininjere wa Metro, Vonani Mashila.
Vito ra yena ri sungurile ku vanga mpfumawulo exikarhi ka tinhenha ta vuyimbeleri, ri hleveteriwa exihundleni xa vuchayelo bya marimba kusuka eGiyani ku ya fika eHarare. Loko a fikisa khume nhungu (18) wa malembe, Metro u nghenelerile vunanga bya Amapiano, laha a nga humesa nghoma ya nghozi leyi vitaniwaka “Subway Surfers”, ri landzeliwa hi “Xiluva xa mina” laha a nga tirhisana na Wayne na Tango. Ntirhisano wa yena wu ndlandlamukile ku fikela eka tinqambhi to fana navo Cull Mobb, Nino Beatz, na Nebo SixFour, laha a nga va na xiave xo andza swinene.
Metro u cincile a sungula ku qambha vunanga bya Xitsonga, a tinyungubyisa hi vunanga lebyi byi nga n’wi kurisa. “Metro u kunguhatile ku qambha vunanga bya Xitsonga endzhaku ka loko vaseketeri va kombisile ku ka va nga tsaki hi vunanga bya Amapiano”, ku boxa mininjere wa yena. Nghoma ya yena ya “Ntsako Wa Moya” laha a hlanganile na Troya na Tyler, ku vile rona budula ra yena hi tlhelo ra vunanga bya Xitsonga, swi tlhela swi n’wi endla nqambhi ya xiyimo xa le henhla leyi ndlandlamukaka.
Tin’wana ta tinghoma leti nga ninginisa Gaza ti landzerile, ku katsa “My Number One”, “Xitori na xitori”, “Forever Wena”, leri nga landzeriwa hi nkandziyiso lowu nga hlaleriwa hi vaseketeri vo hundza 20 000 endzhaku ka nhungu wa masiku. Tinghoma ta yena ta kumeka eka Spotify, Apple music, na Youtube laha ti nga yingiseriwa hi vanhu vo hundza 4 000 000. Namuntlha, nkandziyiso wa nghoma ya “My Number One” wu tlanga eka switichi swa Chanel O, MTV Base, Mzansi Magic, na Moja Love, leyi i ndzima ya mangava eka jaha ra ka Khakhala.
Namuntlha, Metrobeatz RSA a ngo va nqambhi leyi nga rhanga hi tlhelo ra swa vunanga ntsena, kambe u hlohlotela maambalelo, fexeni, na ndzhavuko wa Vatsonga. Hikokwalaho, vahlohloteri va ka Gaza tanihi Gagash, Philani na Kokwani Chauke va tala ku n’wi ndhundhuzela va n’wi vita “jaha ro basa”. Vumunhu, mahanyelo na maambalelo ya Metro ya hlohloterile vantshwa vo tala leswaku va tilangutisa no tiehleketa kambirhi hi maendlelo, maambalelo na mahanyelo ya vona loko va langutisa Metro.
Ehandle ka sweswo, mininjere wa yena, Vonani Mashila u boxile leswaku Metro u languteriwile ku humesa nghoma na DJ Fumza leyi yi nga thyiwa “Vatswari” hi Nwendzamhala 2025. Loko a vutisiwa hi timhaka ta alibamu, u boxile leswaku “Metro u ta humesa alibamu yakwe hi ku xixima n’hweti ya yena ya ku velekiwa. Alibamu yi ta huma endzhaku ka n’hweti ya Ndzati lembe leri landzelaka”.