Wanuna a baleseriwa 

Hi Pilot Manganyi

N’wamabindzu loyi a tivekaka swinene, Godwin Yingwani u baleseriwile a lova hi Mugqivela wa 28, Nyenyankulu 2026 emugangeni waka Makuleke, ehandlenyana ka doroba ra ka Malamulele laha a tirhela kona.

Ku ya hi swiviko swa vaaki, ku boxiwa leswaku vahlaseri lava nga tivekiki va landzelerile Yingwani ku fika emugangeni wa ka Maphophe laha va nga n’wi hupa hi maqulu manharhu. U kotile ku pona eka mhangu yoleyo, kambe nimdyambu u vile a baleseriwa hi maqulu ya nhungu kutani a lovela kwalaho laha a tirhela kona.

Vaaki va boxa leswaku va twile mpfumawulo wa xibalesa hi vusiku bya Mugqivela. Loko va fika laha va nga twa mpfumawulo kona, va kumile ntsumbu wa Yingwani wu lalamile exidziveni xa ngati yakwe, na timbanga ta maqulu ya xibalesa. Ku tiyisisiwile leswaku u hundzile emisaveni hi nkarhi walowo.

Yingwani a ku ri munhu loyi a tiveka swinene, ngopfu-ngopfu hi bindzu rakwe raku xavisa misava ya rivungu. Rifu rakwe ri siyile vaaki va hlamarile no tsana tanihileswi a va tiva a ri munhu wa nhlonipho na rirhandzu. Xivangelo xa ku baleseriwa ka Yingwani a xi tiveki na sweswi, na swona a kuna munhu loyi a nga khomiwa. Nandzu wa ku dlayiwa ka Yingwani wu pfuriwile, na swona vulavisisi byi le ndleleni.

Makwavo wa mufi, Xihundla Yingwani u kombisile ku khumbheka swinene eka xiyenge xa mabulo xa Facebook, laha a nga boxa leswaku -“xilondza lexi a xi nge holi, hambi a wu lo va onhela yini?”. Vaaki va kombisile nseketelo hi xitalo tanihileswi a va tiva Yingwani a ri munhu wo hanya na vanhu.