POMPO YI YIVIWA

Hi Pilot Manganyi

Vaaki va kombisa ku hlundzuka emigangeni ya ka Malamulele endzhaku ka loko ku yiviwile switirhisiwa swa pompo leyi phakelaka eka miganga yo hlaya. Leswi swi siyile vaaki va nga ri na mati hikokwalaho ka vukhamba lebyi. Ntlawa lowu tivekaka tanihi ‘Water Activists’ wu komberile leswaku ku khomiwa vanhu lava va nga tshova va tlhela va yiva eka pompo ya xitichi xa muganga wa le Gumbani hi siku ra 03, Dzivamisoko 2026.

Ku ya hi xiviko xa masipala wa xifundzantsongo xa Vhembe, tisulavoya leti nga tivekiki, ti tshovile ti nghena kutani ti yiva swa nkoka swo tanihi titambhu na switirhisiwa swa gezi. Maendlelo lawa ya endlile leswaku ku va na ntshikelelo lowukulu hi tlhelo ra mphakelo wa mati. Xigamani, Mudavula, Bulwini na miganga yin’wana ya le kusuhi hi yin’wana leyi nga va ehansi ka ntshikelelo wa mphakelo wa mati.

Ntlawa wa Water Activists va kombisile ku sola, va tlhela va kombisa leswaku lowu i nhlaselo eka vukorhokeri bya mati lowu a wu ri kona ematikoxikaya. Ntlawa wu tlherile wu boxa leswaku ku onhiwa ka miako yo tanihi leyi swi tshikelela mphakelo wa masiku hinkwawo wa mati.

Maphorisa va pfurile nandzu wa ku tshoviwa na ku yiviwa ka switirhisiwa eka xitichi xa mati, ndzavisiso na wona wu le ndleleni. Maphorisa va komberile leswaku vaaki va va luma ndleve loko va tiva swo karhi.

Masipala wu boxile leswaku ku lunghisiwa ka xitichi swi nga teka nkarhi, tanihiloko leswi swi yiviweke swa ha fanele ku kumeka loko va nga se lunghisa. Eka nkarhi wa sweswi, vaaki va komberiwile ku tirhisa mati lawa ya nga kona, ni lawa va nga ta kota ku wa fikelela. Varhangeri va miganga va komberile vaaki ku pfuneta ku cingela na ku hlayisa miako leyi va pfunaka hi masiku na mikarhi.