BADUZAH CELTICS YI KHOMANA NA MPHENI HI
Hi Themba Chauke
Baduzha Celtics yi kombisile matlangelo yo antswa swinene endzhaku ko khoma varhangi va le mahlweni eka Ligi ya ABC Motsepe, Mpheni Home Defenders hi ku tlanga ku ringana hi 1-1, eka ntlangu lowu a wu nyanyula swinene. Mpheni leyi nga si hluriwaka kusukela loko nguva yi sungula, yi languteriwa ku heta nguva yi ri emaninginingini ku tlhela ka pfumaleka na vantlhontlhi va ntiyiso.
Tanihileswi xipano a xi tlanga ekaya hi ku seketeriwa hi vaseketeri va xona, Budazah Celtics yi tekile ntlangu lowu hi ku tiyimisela, yi tekela enhlokweni ntlhontlho lowu taka na xipano lexi rhangeke emahlweni eka ligi. Xikongomelo xa Baduzah a ku ri ku khoma vayeni hi matlangelo ya vutihlamuleri, xikan’we na ku tirhisa nkateko wun’wana na wun’wana wo howisa lowu va nga wu kumaka.
Hambiswiritano, ntlangu wu sungurile hi ku tika eka xipano xa le kaya tanihileswi Mpheni yi yiseke ntshikelelo emasungulweni. Ku nga se hela timinete ti nga ri tingani vayeni va vuye va howisa golo leswi nga veka ntshikelelo ehenhla ka xipano xa Baduzah lexi a xi tikomba xi ta lahlekeriwa hi ntlangu.
Ehandle ka ntshikelelo ntlangu wa ha ku sungula, Baduzah Celtics, yi vuye yi kota ku tshamiseka. Va tiyisile eka vatlangi va le ndzhaku, va hlaya matlangelo ya Mpheni, loko xiphemu xo sungula xi ya emahlweni, va hunguta mikateko yo kora eka vayeni.
Eka xiphemu xa vumbirhi, xipano xa Baduzah a xi titshembha swinene, xi tlanga hi ku tiyimisela. Endzhaku ka ku dyondza matlangelo ya vayeni, va sungurile ku ya emahlweni. Matlangelo ya vona ya vuye ya tswala mihandzu loko va hlasela vatlangi va le ndzhaku va boxeketa va howisa golo yo ringanisa, leswi endleke leswaku swikoro swi va 1-1, xikan’we na ku tisa ntshembho eka vaseketeri va le kaya.
Nkarhi wo hetelela wa ntlangu, a ku tshwimbirisaniwa swi twala, laha swipano hinkwaswo a swi lava xikoro xo hlula. Mpheni a yi tikomba yi ta howisa hi matlangelo ya vona, loko Baduzah yi lava ku tirhisa rivilo ra ntlangu ku hlula loku a ku ta va matimu. Kambe ntlangu wu ve wu fika emakumu hi 1-1, laha Baduzah yi nga kuma nkutlunya wa nkoka swinene ehenhla ka varhangi va le ka ligi, loko Mpheni yi ya emahlweni na matimu mo ka yi nga se hluriwa.
Kasi Nkowankowa Continetal yi ya emahlweni na ku pfuka endzhaku ko heta nkarhi wo leha etshakwini ra ligi. Va hlurile xipano xa Labash Academy hi 2-0. Phalaphorwa United va tlangile ku ringana hi tandza-tandza na Selwane White Vultures. Dolphins leyi nga le ka xiyimo xa vumbirhi yi hlurile Vondwe XI Bullets hi 1-0. Mukondeni Young Chiefs yi hlurile Musina United hi 3-2.
Tshakhuma Tsha Madzivandila, lava nge le ku lweni ku papalata xihloka va ha ri ehansi ka ntshikelelo endzhaku ka ku hluriwa 5-2 hi Tzaneen United. Leswi swi va vekaka eka xiyimo xo biha ku papalata xihloka loko nguva yi ta fika emakumu.