NTSEMBYANA WA XULUKA

Hi Pilot Manganyi

Ximila lexi a xi voniwa xi ri ntlawa wa nhova sweswi xi voniwa tanihi ntsembyana wo hanyisa, tanihiloko vanhu va tsutsumelaka eka xona loko va lava ku pfuneka loko va pfumala mali yaku xava mimirhi etikhemisi.

Ximila xa xuluka lexi vanhu a va tiva xi nga ri na ntirho ehandle ka ku vanga nhova sweswi xi tirhisiwa ku tshungula mavabyi yo karhi. Vativi va mitsembyana sweswi va vonile nkoka wa xona laha va vonaka na nkoka wa ku xi hlayisa ehandle ka ku xi hlakula hi nkarhi waku hlakula.

Ximila lexi xi tiveka xi ri na swihlawulekisi swa nkoka swinene leswi lavekaka emirini wa munhu swo tanihi, (omega-3 fatty acids, vitamins A, C & E). Murhi wa Xuluka wa dyiwa hambi ku ri hi ndlela ya masaladi kumbe ndlela yin’wana ya mitsembyana. Ku boxiwa leswaku ximila lexi xa pfuna hi tlhelo ra ku gayela ka nyoka, loko miri wu hisa, kumbe ku hlohlonyiwa emirini.

Kusuka khale, ximila lexi a xi tirhisiwa ku pfuneta ku horisa swilondza, ku pfuneta hi swiphiqo swa le ndzeni, na ku seketela eka rihanyo ra masiku hinkwawo. “Ximilana lexi xi ndzi pfunile nkarhi wun’wana a ndzi hluphiwa hi le ndzeni. Kusuka kwalaho, a ndza ha hluphiwanga hi le ndzeni”, ku boxa Donation Chauke.

Hambiswiritano, vakamberi va mitsembyana va kombela leswaku mitsembyana yo tano yi tirhisiwa hi vukheta. Loko ximila lexi xi ri karhi xi dyeka tanihi xakudyiwa, a ku na nseketelo hi tlhelo ra sayense leri kombisaka vuhlayiseki bya ku pfuna ka xona. Vativi va tiyisisa leswaku ku tirhisiwa ka mitsembyana yo tano swi hunguta matirhelo ya mimirhi leyi pfunaka.