KU YIMISIWA KA PHUROJEKE

Hi Pilot Manganyi

 Vaaki va muganga wa ka Maphophe na miganga akelana yo tanihi Mhinga, Maviligwe, Josefa na miganga ya Saselamani hi ku angarhela va ya emahlweni va koka exilogweni hikokwalaho ka nkayivelo wa mphakelo wa netiweke ku ringana malembe yo hlaya. Va xiyenge xa vuhlanganisi bya tiqinqingo va kunguhatile ku dzima eriyani emugangeni wa ka Maphophe kambe va vuhosi va kokela etlhelo hi mayelana na laha eriyani yi nga dzimiwaka kona.

Hi tlhelo ra nhlayiseko wa eriyani na ku vuyeriwa ka vaaki, va xiyenge xa vuhlanganisi bya tiqingo va vonile swi fanerile ku dzima eriyani exikolweni xa le henhla xa Basopa emugangeni wa ka Maphophe. Hambiswiritano, va vuhosi va bakanyela etlhelo ndzinganyeto lowu tanihileswi va vonaka swi fanerile leswaku eriyani yi dzimiwa emutini wa vona leswaku mbuyelo wu ta eka vona. Ku hambana hi mavonelo loku swi endlile leswaku ntirho wa ku vekela eriyani wu yima, leswi swi siyaka vaaki va nga ri na mphakelo wa netiweke hi ku ringanela.

Vaaki va kombisile ku vilela na ku khumbheka hi mayelana na xiyimo lexi, laha va boxaka leswaku hinkwaswo swi le mavokweni ya va vuhosi. Vaaki va tirhisa netiweke ku tsala mitirho ya xikolo, mabindzu na burisano wa siku na siku, kambe mphakelo wa netiweke hi wona xirhalanganyi evuton’wini bya vona.

“A ndzi swogola swinene ku tsala mitirho ya xikolo loko ndza ha ri mudyondzi wa xikolo xa le henhla xa Basopa, na sweswi swa ha ri tano, ha ha swogola”, ku boxa Tsakani Bila, laha a voyamela eka xiyimo lexi nga si cincaka endzhaku ka malembe layo hlaya.

Ku pfumaleka ka mphakelo wa netiweke swi tshikelela swichudeni, vatirhi na vaaki hi ku angarhela ku fikela sweswi. Loko ndlandlamuxo wa mphakelo wa netiweke wu amukeriwa, ku pfumaleka ka ntwanano exikarhi ka swiyenge leswimbirhi hi xona xirhalanganyi ehenhleni ka phurojeke leyi.

Va xiyenge xa vuhlanganisi bya tiqingo va tshikelela leswaku ku dzima eriyani exikolweni swi ta vuyerisa vaaki na nhlayiseko wa yona, laha ku vekela emutini swi nga vangaka khombo eka yona. Kambe ku kokela etlhelo ka va vuhosi eka ndzinganyeto lowu hi swona swi tsandzisaka ku fikelela makungu lawa.

Tanihiloko phurojeke ya ha yimile, vaaki va languterile leswaku ku va na ntwanano exikarhi ka swiyenge leswimbirhi leswaku eriyani yi ta dzimiwa. A ku na nkarhi lowu vekiweke hi tlhelo ra ku burisana ka swiyenge, kumbe ntwanano wu nga fikeleriwa siku rihi na rihi.