VIPERS YI TIPFUXA

Hi Themba Chauke

Endzhaku ka matlangelo yo tsana lama fikiseke emakumu vunhenha bya vona eka Thonamete ya Khapu ya Meyara wa Giyani lembe leri hundzeke, Vipers yi titivisile ku vuya emaninginingini hi ku hlula xipano xa ntlango wa netball xa Malamulele ku hlula eka thonamete leyi tivekaka hi Annual Nations Sports.

Thonamete leyi a yi khomeriwile emugangeni wa ka N’wamankena ehandlenyana ka doroba ra Giyani, tanihi pfhumba ro tsundzuka vantshwa va lembe ra 1976, laha a ku hlanganile swipano swo hambana-hambana ku va xiphemu xo tlangela hi ku tirhisa ntlango.

Ku hlula loku ku kombisa ku cinca matafula eka xipano xa Vipers, lava a va ri vahluri ehandle ka ku hluriwa eka Thonamete ya Khapu ya Meyara wa Giyani ku ringana malembe ya Khume laha swi nga xaxisiwa hi xipano xa Queens lembe leri hundzeke eka ntlango wa ti semi-fayinali

Hi ku tiyimisela ku vuyisa xindzhuti xa vona tanihi van’wana lava rhangaka emahlweni eka swipano swa netball, Vipers va nghenile eka thonamete va ri na ntshembho lowu pfuxelelekeke na xikongomelo xa le rivaleni ku kombisa leswaku ku hluriwa lembe leri hundzeke a swi ri swa nkarhinyana.

Hambileswi a va langutanile na xipano xa vatlangi vo leha swinene va xipano xa Malamulele, muhowisi wa tigolo, Mixo Shitlhavani u tlangile hi ku tiyimisela ku tiyisisa leswaku bolo yin’wana na yin’wana leyi yaka emavokweni ya yena yi va xikoro. Vipers yi tlangile hi xiyimo xa le henhla leswi endleke leswaku va tibukutela khapu, ntsengo wa R3,000 na timendlele ta nsuku.

Hambiswiritano, ku hlula ka Vipers swi tlula xidlodlo tanihileswi swi nga xikombiso xo tipfuxeta endzhaku ka matlangelo yo tsana ya nguva leyi hundzeke na ku ba xigandlu leswaku xipano ka ha ri xonaxona eka ntlango wa netball eGiyani.

Leswi a hi hungu leri tsakisaka eka xipano xa Queens, lava nga ta va va sirhelela xidlodlo xa Thonamete ya Khapu ya Meyara leyi nga ta sungula hi Mawuwani. Vipers yi kombisa leswaku se yi vuyile, Leswi swi vula leswaku vasirheleri va xidlodlo, lava heriseke ku hlula ka Vipers lembe leri hundzeke, sweswi va fanele ku phikizana na Vipers leyi vuyeke hi matimba ku ta lwela xidlodlo lexi.