KU SUSIWA KA THAVHENE

Hi Pilot Manganyi

Hosi Makuleke ehansi ka masipala wa Collins Chabane u lerisile n’wini wa thavhene ya Ahi Tsakeni leswaku a rhurhisa thavhene yakwe laha yi simekiweke kona. Thavhene leyi yi tshamile ekusuhi na gondzo ra swifambo na swona hi yona yi nga exikarhi ka muganga wa ka Makuleke ehenhla ka tithavhene hinkwato leti nga kona emugangeni lowuya.

Xileriso lexi xi vangile pfilunganyo na njhekanjhekisano exikarhi ka vaaki, tanihiloko xivangelo xa ku rhurhisiwa ka thavhene leyi xi nga tivekiki. Thavhene leyi yi na malembe na malembe yi ri karhi yi tirha tanihileswi vaaki va yi tivaka hakona. Van’wana va vaaki va ehleketelela leswaku ku va yi ri ekusuhi na xikolo xa le hansi xa Joas Phahlela ku nga va ku ri xona xivangelo xa xiboho lexi tekiweke hi va vuhosi, tanihileswi va vonaka i nga ku swi nga hlohletela vana leswaku va nwa mabyalwa. Loko van’wana va ri karhi va ehleketelela leswaku swi nga va swi ri na vupolotiki exikarhi, laha va kombisaka leswaku thavhene yi na malembe yo hlaya yi ri karhi yi tirha kambe mixikaxika yo tani a yi va nga kona.

Xiboho lexi xi endlile leswaku van’wana vaaki va tseketsela va vuhosi swinene, laha va kombisaka leswaku ku susiwa ka thavhene a swi amukeleki na swona a swi twisiseki hikuva i khale yi ri kona. Un’wana wa vaaki u kombisile ku khumbheka ka yena hi mayelana na xiboho lexi. “Thavhene leyi i khale yi ri kona na mina a ndzi tivi matumbulukelo ya yona. Yi endla leswaku vanhu va dzumba kahle na swona n’wini wa yona a nga si tshama a hi vangela madzolonga. Ku yi rhurhisa sweswi endzhaku ka malembe layo tala i nsono”.

Ehandle ka xileriso xa va vuhosi, thavhene yi ya emahlweni yi tirha tanihi ntolovelo eka nkarhi wa sweswi. A swi tiveki leswaku ku ta nghenelela va xinawu, kumbe va vuhosi va ta langutisana na swona kumbe n’wini wa thavhene u ta landzelela xileriso kumbe ku xi kaneta. Hambiswiritano, van’wana vaaki va vona swi fanerile leswaku thavhene yi ya emahlweni yi tirha tanihi ntolovelo tanihileswi va nga voniki yi ri na xiave eka ku kanganyisa tidyondzo ta vana.