MASIPALA WU HLANGANA NA VAN’WAMAHUNGU

Hi Andrew Hlongwane

“Van’wamahungu va laveka leswaku hi fambisana na vona hambileswi kun’wana va hi bukutelaka hikuva hina hi tibyela leswaku i vanghana va hina kambe vona va lava ku hi luma”-lawa i marito ya Meyara wa Masipala wa Tzaneen, Odas Ngobeni, hi nkarhi lowu a burisana na vateki va mahungu eHotela ya Tzaneen.

Hambiswiritano, Ngobeni u hlamuserile leswaku kun’wana swi na nkoka swinene leswaku vateki va mahungu va endla vulavisisi ehandle ko kandziyisa mahungu hi xikongomelo xo onha van’wana mavito.

Ngobeni u tlhele a kombisa leswaku hi mikarhi yin’wana vaakatiko va hetelela va endla xitereko hi mhaka yo pfumala vuxokoxoko kambe loko vo kuma xiviko eka vuhangalasi bya mahungu va hetelela va hatla va swi twisisa.

Hambiswiritano vateki va mahungu va kombisile leswaku vaakatiko vo tala va vilerisiwa hikuva mapatu ya vona ya lunghisiwa ntsena loko ku humelele nkosi nakona ku endliwa patu leri ri nga humeleriwa hi khombo.

Hambi ku ri mati vaakatiko va kombisa leswaku ku fanele ku endliwa xikombelo leswaku ku tisiwa mati laha ku nga humelela nkosi. Ngobeni u kombisile leswaku va ta languta swinene leswaku va tisa ku cinca eka mhaka leyi.

“Eka tindhawu tin’wana hi va na swiphiqo loko mapatu ya vona ya ri matsongo. Timovha to lungisa ti tsandzeka ku nghena ti lunghisa mapatu hikuva ya ri matsongo. Hi ta endla vulavisisi eka tikhanselara ta hina lava kumaka muholo va nga tirhi. Ri fikile hungu hi van’wana va tikhanselara ta hina lava hetaka tin’hweti to ringana tinharhu va nga si vonaka na le ka nhlengeletano wa huvo ya masipala leswi kombisaka leswaku va dya mali ya masipala va nga ri ku tirheni ka nchumu”, ku vula Ngobeni.

Ngobeni u khumbe swotala ku katsa na ku endla vulavisisi eka tikondiraka leti tekaka nkarhi kumbe leti hundzeriwaka hi nkarhi hambi leti tsandzekaka ku heta ntirho kumbe ku tsandzeka ku hakela vatirhi.

“Hi ri masipala a hi si tshama hi tsandzeka ku hakela van’watikondiraka loko va heta ku tirha a hi hundzisi n’hweti”, ku vula Ngobeni. Ngobeni u endlile xikombelo leswaku va maphephahungu va nga tsali mitirho ya hina yo biha ntsena kambe na leswinene swa hangalasiwa.

Hambiswiritano, masipala wa Tzaneen wu ri wu tiyimiserile na ku tirha hi matimba leswaku va pfuneta maphephahungu ya laha makaya hi swa le mandleni.

Ngobeni u gimetile hungu ra yena hi ku kombela vateki va mahungu leswaku va nga heli matimba hikuva masipala wu le ku endleni ka ntshamo nkarhi wun’wana na wun’wana hi swona.