MASIPALA WU SIMEKA MPHIKIZANO

Hi Pilot Manganyi

Masipala wa Collins Chabane wu simekile mphikizano wa Khapu ya Meyara hi Musumbhunuku 13, Mawuwani 2026. Lowu i mphikizano wa lembe na lembe lowu kongomaneke na ku tlakusa vantshwa, ku valanga vuswikoti na ku hlanganisa vaaki hi pfhumba ra ntlangu wa bolo ya milenge.

Nkhuvo lowu a wu khomeriwile eholweni ya vaaki ya ka Malamulele kusukela hi awara khume mbirhi ni nhlikani. Nkhuvo lowu a wu xiximiwile hi vukona bya Hosi Rhangani Mahonisi ku suka emugangeni wa ka Mahonisi, swirho swa komiti ya tiwadi, tikhanselara, huvo ya xiyenge xa mitlangu eka masipala na van’wana vakhomaxiave.

Swihlawulekisi swa nkhuvo lowu ku vile ku tirhisana na marhavi ya swipano swa rixaka. Swipano leswi swi nga ta teka xiave eka mphikizano lowu swi katsa xipano xa Gomora United, laha n’wini wa xona tlhelo mutshamaxitulu Joe Seanego a nga tlhela a xixima nkhuvo hi vukona bya yena. Ntirhisano lowu wu languteriwile ku pfuna ku valanga vatlangi va ndhuma na ku hlohletela vantshwa ku va va tinyiketela eka ntlangu wa bolo ya milenge na mitlangu yin’wana.

Meyara Shadrack Maluleke u boxile leswaku, “hi languterile leswaku mitlangu leyi yi nga ta tlangiwa ku va na ku ringanela hikuva mhakakulu i ku hlanganisa rixaka. Ha swi tiva leswaku mphikizano lowu wu ta tisa nkateko eka vantshwa kuya tlangela swipano swa le henhla.”

Kuya emahlweni, swipano leswi nga ta teka xiave eka mphikizano lowu i swipano swa miganga ya le Collins Chabane, laha pfhumba leri ri ndlandlamukaka ku suka eka mphikizano lowu nga va kona malembe lama nga hundza wa Thonamete ya Meyara. Vuxokoxoko bya xitalo hi mayelana na nxaxamelo wa swipano leswi nga ta teka xiave eka mphikizano lowu byi ta landzela eka masiku lama taka, ku katsa ni laha mitlangu ya mphikizano lowu yi nga ta tlangeriwa kona.

Makungu ya mphikizano lowu ya fambisana ngopfu na swikongomelo swa masipala swa ku hlohletela vantshwa na ku tirhisana na swipano swa rixaka eka ku vuyeriwa ka vaaki.