XIPANO A XI XAVISIWI

Hi Pilot Manganyi

Xipano xa Mabcity United ku suka emugangeni wa le Maviligwe, etindhawini ta ka Malamulele, xi bakanyerile etlhelo swihehlo swa leswaku xipano xi lava ku xavisiwa, laha xipano xi nga kombisa leswaku “i mavun’wa.” Xipano xi tiyisisile leswaku swihehlo leswi swi hangalasiwa hi vanhu lava nga laviki ku vona mitirho ya xipano yi ya emahlweni.

“Xipano xa Mabcity United xi tsakela ku bakanyela etlhelo swihehlo swa leswaku xipano xi lava ku xavisiwa. Swihehlo leswi a hi swin’wana ehandle ka mavunwa lawa ya hangalasiwaka hi vanhu lava nga laviki ku vona ndlandlamuko, vun’we na ku humelela ka xin’wana xa swipano emigangeni ya ka hina”, ku boxa xitatimende.

Xipano xi yile emahlweni xi tiyisisa leswaku xi akiwile hi “xivono, ku tiyimisela, ku tirha hi matimba na ku tiyimisela eku ndlandlamuxeni ka tinyiko ta vantshwa eka bolo ya milenge”. Xipano xi tlherile xi boxa leswaku “a kuna makungu ya ku xavisa xipano”, xi tlhela xi tiyisisa eka vaseketeri, vanyikeri, vakhomaxiave na vaaki laha xi yimeke kona.

Xipano xi tlherile xi boxa leswaku, “eka n’wina mi yaka emahlweni mi vulavula mavunwa, hina rungula rin’we eka n’wina, vunwa bya n’wina i mati lawa ya cheletaka ximilana xa ku humelela eka hina”.

Mabcity United yi hundzisile hungu lerinene eka ndlandlamuko wa yona tanihileswi yi tilunghiselaka ku sungula nguva ya ligi ya SAFA Vhembe. Xipano xi boxile leswaku xi endlile matshalatshala ya leswaku xi va na ntwanano na vatlangi va xiyimo xa le henhla lava nga ta va xiphemu xa xipano loko ku nga si sungula nguva ya 2026/2027.

Hambiswiritano, xipano xi khensile vaseketeri na vakhomaxiave na un’wana na wun’wana loyi a tlangaka xiave eka xipano. “Nseketelo wa n’wina lowunene i masungulo ya laha xipano lexi xi kulaka xi ri karhi xi suka kona. Xikan’we, hi ta nyumisa lava hi nyadzaka, kungari hi marito kambe hi mbuyelo, vun’we na ntirhisano”.