KHOMITI YA TINKOTA YI NA XIKONGOMELO

Hi Themba Chauke

Meyara wa masipala wa Giyani, Thandi Zitha u ntlhontlhile Komiti ya Tinkota ya Masipala leyi ya ha ku thoriwaka ku pfuna masipala ku fikelela swiviko swa timali swo basa, xikongomelo lexi ka ha riki norho hambileswi masipala wu nga kuma swiviko swa kahle ku ringana kanharhu hi ku landzelelana.

Loko a vulavula hi nkarhi wa ku tivisiwa ka komiti hi Musumbhunuko, Zitha u vule leswaku masipala wu kumile swiviko swa kahle swa tinkota eka malembe ximali manharhu lama hundzeke, kambe a tshikelela a vula leswaku nkarhi wu fikile wo antswisa xiviko xa tinkota hi ku kuma xiviko xo basa.

  U vule leswaku Komiti ya Tinkota yi tlanga xiave xa nkoka ku tlhoma tihlo eka ku tiyisisa mafambiselo, ku hlohletela vutihlamuleri na ku tiyisisa mafambiselo ya kahle ya swa timali eka masipala.

U ntlhontlhile komiti leyi ya ha ku thoriwaka ku yisa emahlweni ntirho lowu sunguriweke hi varhangi va le mahlweni hi ku pfuna masipala ku lulamisa leswi saleke leswi sivelaka masipala ku fikelela mbuyelo wa le henhla wa tinkota.

Meyara u pfurile ntirho wo amukela komiti hi ku khensa ntirho lowu endliweke hi Komiti ya Tinkota leyi humaka, hi ku khensa swirho swa komiti eka ntirho lowu va wu endleke malembe manharhu lama nga hundza. U vule leswaku komiti leyi humaka yi ntlangile xiave xa nkoka eka ku antswisa mafambiselo na ku tlhoma tihlo eka timhaka ta swa timali, kambe a tshikelela leswaku komiti leyi nghenaka sweswi yi rhwala vutihlamuleri byo yisa masipala eka xiyimo lexi landzelaka.

Zitha u boxile leswaku ku kuma xiviko xo basa a swi nga ta olova, kambe a kombisa ntshembho wa leswaku vutivi, ntokoto na ku tinyiketela ka komiti leyintshwa swi nga tiyisisa vulawuri bya ka masipala na ku antswisa swilaveko swa milawu ya mafambiselo ya swa timali.

U hlohleterile swirho ku endla ntirho wa vona hi vurhon’wana na ku tirha kusuhi swinene na vufambisi bya masipala ku tiyisisa leswaku ku tsandzeka loku paluxiweke hi Muhleri wa Tinkota swa lulamisiwa hi xihatla.

Kasi hi hala tlhelo, masipala wa Giyani wu tumbuluxile ro sungula Komiti ya Vuhleri bya Tinkota hi lembe ra 2023 tanihi matshalatshala yo tiyisisa ku tlhoma tihlo eka swa timali na ku hunguta mbuyelo wo tsana lowu a wu tshamela ro kumiwa hi Muhleri wa Tinkota.

Hambileswi masipala wu kumeke xiviko xo antswa xa swa timali eka malembe manharhu hi ku landzelelana ku sukela loko komiti yi tumbuluxiwile, masipala wa ha kayivela ku kuma xiviko xo basa, leswi kombisaka leswaku swin’wana swa swilo leswi paluxiweke hi Muhleri wa Tinkota a swi se lulamisiwa.

Komiti leyi ya ha ku thoriwaka yi languteriwa ku langutisisa maendlelo yo lulamisa leswi lavekaka, ku kambela mafambiselo na ku nyika mavonelo yo tiyimela ku pfuna masipala ku antswisa mafambiselo xikan’we na ku fikelela xiviko xo basa xa tinkota.