HAWKS YI ENDZELA HOSI

Hi Pilot Manganyi

Hi siku ra 29, Mawuwani 2026, HAWKS yi endzerile yindlu ya vuhosi leyi rhangeriwaka hi Hosi Humphrey Mugakula emugangeni wa ka Makuleke. Makungu ya HAWKS ku va yi endzela Hosi Mugakula a ku ri ku xengenudza mafambelo na mafambiselo ya muganga wa ka Makuleke.

HAWKS yi fikile yi valanga masayinelo ya swiviko swa mafu loko munhu a lovile na mafambiselo man’wana. Hambiswiritano, ku vikiwa leswaku Hosi Mugakula a nga na mpfumelelo wa ku sayina matsalwa man’wana tanihileswi a nga si amukeriwaka ximfumo hi Holobyenkulu, Dok. Phophi Ramathuba. Leswi swi siyile swivutiso swo tanihi ku lava ku tiva leswaku “loko kungari Hosi Mugakula la faneleke ku sayina matsalwa, xana ku ta sayina mani?”

Swin’wana swa swihehlo swi anakanya leswaku ku endzela ka HAWKS evuhosini a ku nga ri swa ntsena. Va kombetela makungu ya ku endzela ka HAWKS eka vuhosi bya ka Mhinga. Leswi swi ta endzhaku ka loko vuhosi bya ka Mhinga byi ri karhi byi bakanya leswaku muganga wa ka Makuleke wu tiyimerile hi woxe. Hambiswiritano, khoto yi angurile malembe ndzhaku leswaku muganga wa ka Makuleke wu tiyimerile ha woxe na swona a wu weli ehansi ka vuhosi bya ka Mhinga. Vuhosi bya ka Mhinga byi yile emahlweni byi rhumela xikombelo eka khoto mayelana na swikoxo leswi hi n’hweti ya Khotavuxika, laha ku yimeriweke n’wangulo wa khoto.

Muganga wa ka Makuleke wu na ndzhaka ya kwalomu ka 27 000 wa tihekitara entangeni wa swihari wa Kruger laha va rhurhisiweke kona, Makuleke yi khomile miganga yinharhu, purasi na swin’wana leswi nga na mbuyelo. Swilo leswi swi endlile vaaki va anakanya leswaku ku nga va swona leswi vangaka mpfilumpfilu exikarhi ka vuhosi lebyimbirhi. Hambiloko khoto yi tiyisisile ku va Makuleke ku ri muganga lowu wu tiyimeleke ha woxe, vaholobyenkulu lava humeke ku fikela sweswi a va amukelanga vuhosi bya ka Makuleke ximfumo ni leswaku muganga wu tiyimerile ha woxe. Akuna n’wangulo lowu va wu nyikeke hi mayelana na mhaka ya ku va va nga amukelanga vuhosi bya ka Makuleke ximfumo.

Vaaki va boxa leswaku ku va Hosi Mugakula a nga amukeriwanga ximfumo hi Holobyenkulu swi tisa ntshikelelo eka vutomi ni swilaveko swa vona swa nkoka. Leswi swi katsa ku sayiniwa ka mapapila ya vukati, mafu na vutshamo. Vaaki va kombela leswaku muganga wa vona wu khomiwa hi ku ringanela na ku nyikiwa tifanelo ta vona.