VAAKI VA MANGALELA MAPHORISA

Hi Themba Chauke

Xandla xa Holobye wa Maphorisa Cassel Mathale u lemukisile Khomandara wa Maphorisa ya xitichi xa Giyani Brigadier Solomon Serakwana na Khomixinara wa Maphorisa ya xifundzantsongo xa Mopani Mejara Jenerali Willy Mashaba ku teka magoza ya vukarhi ehenhla ka swihehlo swa vukungundzwana xikan’we na ku vuyisa ntshembo wa vaaki eka xiphorisa.

Mathale u nyikile xilemukiso lexi hi Mugqivela eka Imbizo ya maphorisa leyi a yi khomeriwile eholweni ya vaaki ya ka Thomo, etindhawini ta Giyani, laha vaaki na varhangeri va vaaki va kombiseke swivilelo mayelana na mathikhomelo ya maphorisa, vukorhokeri byo antswa xikan’we na swihehlo swo tsandzeka ku endla vulavisisi eka milandzu.

Rendzo ra xandla xa Holobye ri landzela swivilelo swo hlaya ku suka eka vaaki, ku katsa na xirho xa palamende Kate Bilankulu, loyi a vulavuleke hi leswi a hlanganeke na swona exitichini xa maphorisa ya Giyani loko a ya kombela mpfuno.

Bilankulu u vule leswaku u vilerisiwile swinene hikwalaho ko va khomandara wa xitichi a nga vonanga swi nga tshamisekanga hi matikhomelo ya maphorisa yo pfula milandzu. Hambiswiritano, eka swin’wana swihehlo leswi paluxiweke, lexi xi tikombeke xi ntlhontlhile Mathale swinene i swihehlo swa leswaku maphorisa ma na mukhuva wo endzela rhenge ya mathekisi va pfurile mafasitere ya tivhene ta maphorisa ku teka mali hi masaka ku suka eka vaehleketeleriwa vo xavisa swidzidziharisi.

“A swi tshamisekanga leswaku maphorisa ma ya erhengini ya mathekisi va chayela va pfurile mafasitere ya timovha va tleketla mali ya swidzidziharisi, ku nga ri ku khoma,” ku vula Mathale. “Ndzi tshembha leswaku Mejara Jenerali Scheepers u swi twile,” u ya emahlweni.

Mathale u vule leswaku swivilelo leswi swi kombisa leswaku maphorisa ma tsandzeka ku hetisisa vutihlamuleri bya vona eka vaaki. “Leswi swi kombisa leswaku a mi endli ntirho wa n’wina tanihi maphorisa,” ku vula yena, laha a kombiseke leswaku na tihosi ti n’wi byerile leswi fanaka.

Xandla xa Holobye u tlhele a kombisa xivilelo mayelana na ku dlawa ka muhundzuluxi wa le khoto hi nkarhi lowu a ya ekaya eka Malamulele, laha a kombiseke leswaku mhaka leyi yi tikomba yi nga boxi ndzima hambileswi yi nga mhaka ya xiyimo xa le henhla, a tlhela a lerisa leswaku ku tekiwa goza ehenhla ka mhaka leyi. Ku tlhela ku hehliwa leswaku ku na vanhu lava humeseka swibamu emahlweni ka xitichi xa maphorisa ku nga endliwi nchumu hi swona, laha a nga kombela Serakwana na Mashaba ku teka magoza ehenhla ka swihehlo leswi paluxiweke eka Imbizo.

Kasi khomixinara wa maphorisa Mejara Jenerali Jan Scheepers u amukerile leswaku vuxaka exikarhi ka maphorisa na vaaki bya tsekatseka, laha a kombiseke leswaku leswi swi kombisiweke eka Madlanga swi kombisa ku pfumaleka ka ntshembo wa maphorisa hi vaaki.

U komberile vaaki ku mangala vukorhokeri byo tsana xikan’we na milandzu leyi maphorisa ma tsandzekaka ku yi lavisisa. “Swi lava mi yima hi milenge rito ra n’wina ri twakala. Mi nga miyeli. Loko mi pfula dokete mi vona ku nga fambi nchumu, swi lava mi vulavula, ndza mi tshembhisa leswaku ku ta va na switandzhaku.” Ku vula yena.