MOLO WUNTSHWA EKA MALAMULELE

Hi Pilot Manganyi

Nhluvuko edorobeni ra ka Malamulele wu ya emahlweni hi xiyimo xa le henhla. Leswi swi ta endzhaku ka loko ku languteriwile ku akiwa molo wuntshwa. Kuya hi vuxokoxoko bya phurojeke na switatimende swa vatumbuluxi, molo lowu wu languteriwile ku va wu herile hi n’hweti ya Mhawuri 2027.

Phurojeke ya molo wa ka Malamulele yi le mavokweni ya Masingita Group ehansi ka Dok Mike Nkuna, ku nga khamphani leyi tivekaka swinene hi tlhelo ra ku aka timolo. Nhlangano lowu wu vile na xivono xa ku aka molo wa manyunyu ku suka malembe ndzhaku, kambe milorho ya vona a yi tekanga vundhawu hikokwalaho ka nkavanyeto. Nkuna u tiyisisile ximfumo, laha a nga tlhela a boxa leswaku makungu lawa a ma ri kona kusukela malembe ya khume nkombo (17) lama nga hundza.

Hambiswiritano, nhlangano wa Yinhla Property Development wu vile wu endla xikombelo xa ku yimisa phurojeke leyi, kambe Khotokulu ya Thohoyandou yi vile yi bakanyela etlhelo xikombelo lexi. Nkuna u vile a tivisa vaaki leswaku phurojeke ya ku aka molo yi ya emahlweni.

Swiviko swi tlhela swi kombisa leswaku ku na bodo ya xikoweto leyi dzimiweke kusuhi na xikolo xa khale xa le henhla xa ka Malamulele, laha yi tiyisisaka leswaku phurojeke leyi yi ya emahlweni naswona molo wu nga pfula hi lembe ra 2027. Hambiswiritano, ndhawu leyi ku languteriweke ku va ku akeriwa eka yona molo yi endla kwalomu ka 21,000 m², laha ku nga ta nghena mavhengele yo ringana 70.

Hambiloko doroba ra ka Malamulele ri ri na molo wo tanihi Malamulele Crossing, lowu akiweke hi Masingita Developments, phurojeke leyi yi languteriwile ku engetela mavhengele na ku tumbuluxa mitirho emigangeni ya vaaki va ka Malamulele.