XIHAHAMPFHUKA XA MATIMU XI PENDIWILE ELIMPOPO

Hi Mapula Glashy Makoto

Xihahampfhuka xa Embraer lexi nga pendiwa hi muhlovo wa rihlaza na wa nsuku lowu kombisaka xipano xa rixaka xa ntlangu wa rugby xa Springbok, xi le ku beni ka bembere emisaveni hinkwayo.

Swiviko swi kombisa leswaku xihahampfhuka lexi, xi rhangile hi ku pendiwa erivaleni ra swihahampfhuka ra matiko ya misava ra Polokwane, xi nga si ya koka vanhu rinoko eCapeTown exifundzenikulu xa Western Cape. Vatirhi va vula leswaku Xihahampfhuka lexi tsariweke ZS‐YAE, xi hetile masiku ya 29 xa ha pendiwa laha xi nga heta kwalomu ka 60 wa tilitara ta pende.

Xi vangamile swinene hi nkarhi wa ku famba ka swihahampfhuka swa Airlink ehenhla ka rivala ra mitlangu ra DHL eka ntlangu wa Springboks na All Blacks. Ku pendiwa ka xihahampfhuka nakambe ku kombisa ntirho wa xithekiniki lowu endliweke erivaleni ra swihahampfhuka ra matiko ya misava ra Polokwane, leri lawuriwaka hi va Gateway Airports Authority Limpopo (GAAL).

Vatirhi va swihahampfhuka va vula leswaku phurojeke leyi yi kombisa vuswikoti bya swihahampfhuka lebyi kulaka bya xifundzakulu na vuswikoti bya ntirho wo hlawuleka. Limpopo yi nyika mfikelelo eka tindhawu letikulu ta vupfhumba to fana na Ntanga wa swihari wa Kruger, Ndhawu ya Ndzaka ya Misava ya Mapungubwe na Waterberg.

Xifundzakulu xa Limpopo xi tlhela xi va na ndzilakano wo nghena eBotswana, Zimbabwe na Mozambique, leswi endlaka leswaku xi va na nkoka eka vupfhumba na mabindzu. Loko n’hweti yo koka vapfhumba rinoko yi sungula, varhangeri va vaaki va tshemba leswaku xihahampfhuka lexi xi ta kombisa switirhisiwa swa le Limpopo, na ku pfuneta ku koka rinoko ra vaendzi vo tala, migingiriko ya mabindzu na vutleketli exifundzenikulu.