MASEKELA A TEKA SAGWATI 

Hi Mapula Glashy Makoto

Joseph Ntsiene Masekela, nhloko ya xikolo xa le henhla xa Flora Park Comprehensive ePolokwane, u hlawuriwile tanihi muhluri wa xifundzakulu eka xiyenge xa ​​vurhangeri bya swikolo swa le henhla eka masagwati ya rixaka ya vadyondzisi.

Masekela u vule leswaku u xiximiwile swinene ku va a amukela sagwati leri naswona u khensa swirho hinkwaswo swa le xikolweni. U vule leswaku sagwati leri ri kombisa leswi nga kotaka ku fikeleriwa ntsena loko tihloko ta swikolo, vadyondzisi, vatswari, vadyondzi na vaseketeri van’wana va nga kotaka ku tirhisana swin’we.

U vule leswaku vurhangeri bya yena byi kongomisa eka ku tshembeka, ku tirhisana na vanhu van’wana na ku rhangisa vadyondzi emahlweni. Masekela u rhangela hi xikombiso ku seketela vadyondzisi na ku hlohletela miehleketo leyintshwa ku antswisa ndlela ya ku dyondzisa na ku dyondza.

U tlhele a kombisa leswaku magoza ya nkoka lama faneleke ku vekiwa tihlo eka ku humelela ka swikolo ya katsa ku vekiwa ka kharikhulamu leyi tiyeke. Minongonoko yo seketela vadyondzi, milawu ya dyondzo leyi nga erivaleni na ku nghenelela hi xihatla ku suka eka vatswari na huvo ya vufambisi bya xikolo (SGB).

U vule leswaku xikolo xi kota ku hlula swiphiqo hi ku tirhisana na swirho swin’wana, na ku kota ku vulavurisana na swirho hinkwaswo leswi nga eswikolweni. Masekela u tshemba leswaku dyondzo eLimpopo yi ta humesa vantshwa lava titshembaka, lava nga na vutshila lava nga pfunetaka ku aka vumundzuku byo antswa.

U engeterile a vula leswaku sagwati leri ri ta n’wi hlohletela na xipano xa yena ku tshama va ri karhi va antswisa xikolo xa vona loko swi ta eka timhaka ta dyondzo