MUHLOTI A DLAWA HI TINDLOPFU EKRUGER

Hi Themba Chauke

Muhloti wa swihari swi nga ri enawini u vuriwa ku va a kandziyeriwile hi tindlopfu kutani humba yi olela nkuma entangeni wa swihari wa Kruger, loko ntangha yakwe hi swiendlo yi tsema yi ri vona. Lavambirhi va vuriwa ku va va nghenile entangeni wa swihari swi nga ri enawini hi xikongomelo xo dlaya swihari.

Kuya hi va ntanga wa swihari, lavambirhi va hlanganile na ntlhambi wa tindlopfu hi nkarhi lowu a va ri eka tikhilomitara ta tsevu endzeni ka ntanga etindhawini ta Pafuri. Kwaloho tindlopfu ti va hlongorisile, leswi endleke leswaku un’wana na un’wana a lava ya yena ndlela tanihileswi vutomi byi nga hanyeriwiki.

Endzhaku ka nkarhi, muehleketeleriwa loyi a Poneke u twile mukhosi wa xirilo xa munghana wa yena, kambe yena a dya ehansi a nga languti endzhaku hi ku chavela vutomi byakwe a kongoma endhawini yo huma hi yona ku fikelela vuhlayiseko. Loko a fika ekaya, u tivisile vaaki va muganga wa ka vona leswi nga humelela, a tlhela a va byela leswaku u twile xirilo xa mukhosi wa munghana wa yena hi nkarhi lowu a a ri eku dyeni ehansi.

Kuya hi xitatimende xa ntanga, ku vuriwa leswaku marhenja ya kumile vuxokoxoko bya vavanuna vambirhi lava ngheneke entangeni wa swihari hi le tindhawini ta le Pafuri hi siku ra 11 Ndzhati 2026, hi xikongomelo xo hlota swihari.

Mhangu leyi yi vuye yi mangariwa eka maphorisa ya tiko ra Afrika-Dzonga. “Hi mpfuno wa vaaki, muehleketeleriwa un’we u vuye a khomiwa. Mueheketeleriwa loyi u vuye a pfumela leswaku u nghenile entangeni wa swihari swi nga ri enawini, laha a nga famba na marhenja kuya va komba laha mhangu yi nga humelela kona,” ku hlamusela xitatimende.

Marhenja ma landzelerisile mikondzo kusuka enambyeni wa Rivhubye kwalomu ka tikhilomitara ta tsevu kusuka eka rihlampfu ra Pafuri kuya endzeni ka ntanga laha va nga kuma ntsumbu wa muehleketeleriwa loyi a nga nyamalala. Hi nkarhi wa musecho, ku tlhele ku kumiwa na masalelwa ya nyarhi, leyi ku vuriwaka leswaku yi dlawile swi nga ri enawini hi vahloti. Loko a vutisiwa hi xiyimo xa ntsumbu, mufambisi wa timhaka ya vuhlanganisi entangeni Rey Thakuli, u vule leswaku ntsumbu a wu nga dyiwanga hi swihari loko wu kumeka. Vulavisisi lebyi faneleke eka mhangu leyi byi ya emahlweni