XIBEDLELE A XI NA MUFAMBISINKULU
Hi Themba Chauke
Xibedlele xa Nkhensani se xi vile na vafambisikulu va nkarhinyana vo ringana ntlhanu kusukela hi lembe ra 2016, endzhaku ka ku suka ka Themba Mhlanga, loyi a thoriwile ku tirha nkarhi hinkwawo. Madida Malatji i mufambisinkulu wa nkarhinyana loyi a ha ku sukaka eka xivandla lexi, hambileswi ndzawulo ya Rihanyo ya Limpopo yi kanetaka swihehlo swa leswaku u susiwile eka xivandla lexi, laha va vulaka leswaku ku thoriwa ka yena a ku ri swa nkarhinyana.
Mhaka leyi yi siyile swivutiso nakambe swa leswaku hikwalaho ka yini xivandla xa mufambisinkulu xi tshama xi ri hava mutirhi wa nkarhi hinkwawo ku ringana malembe ya nhungu, hambileswi xibedlele xa Nkhensani xi vekiweke eka xiyimo xa swibedlele swa xifundzantsongo.
Loko a hlamula eka swivutiso swa mhaka leyi, muvulavuleri wa ndzawulo ya Rihanyo eka xifundzakulu, Neil Shikwambana, u vule leswaku Malatji a nga susiwanga exitulwini xa mufambisinkulu tanihileswi a thoriwile ku khomela.
Hambiswiritano, ndzawulo ya pfumela leswaku a yi si pfala xivandla lexi kusukela loko Mhlanga a sukile eka xivandla lexi hi 2016. Shikwambana u vule leswaku ku hlwela loku a swi endliwa hikwalaho ka mpfumaleko wa swa timali leswi a swi sivela ndzawulo ku pfala xivandla lexi.
“Loko ku vile na ku antswa eka xiyimo xa swa timali xa ndzawulo, xivandla xa mufambisinkulu xi vuye xi navetisiwa ko hlaya. Hambiswiritano, migingiriko yo thola a yi kumanga munhu la faneleke ku pfala xivandla lexi hikwalaho ka nhlayo ya le hansi ya vanhu lava kombiseke ku tsakela, xikan’we na ku pfumaleka ka munhu la ringaneleke ku pfala xivandla lexi,” ku vula yena.
Xikwambana u yimelerile xibedlele eka ku thoriwa ka mufambisinkulu wa nkarhinyana, laha a vuleke leswaku swa laveka leswaku a ta nyika vurhangeri loko matshalatshala yo thola mufambisinkulu wa nkarhi hinkwayo ya ya emahlweni.
Kuya emahlweni ku tirhisiwa vafambisikulu va nkarhinyana swi vula leswaku xibedlele xi ya emahlweni xi tirha ehandle ka munhu loyi a nga thoriwa nkarhi hinkwawo, laha Shikwambana a nga vula leswaku sweswi ndzawulo yi le ku endleni ka matshalatshala yo pfala xivandla lexi, kambe a vula leswaku a ku vekiwanga nkarhi lowu xivandla lexi xi faneleke ku pfariwa hi wona.