SECHA-SIX YI HLULA HAMBI SWI TIKA
Hi Themba Chauke
Secha-Six ya le wadi 18, emugangeni wa ka Muyexe, yi endlile leswi nga languteriwangiki ku kuma xidlodlo xa Khapu ya Meyara eka ntlangu wa bolo ya milenge ya vavanuna endzhaku ka ku hlula xipano xa Dzingidzingi Brazil xa Wadi 21, kusuka emugangeni wa ka Dzingidzingi hi 1-0 eka tifayinali ta Khapu ya Meyara. Ku hlula ka Secha-Six a swi ri swa nkoka swinene tanihileswi xipano xa Wadi 18 xi ngheneke eka thonamete tanihi xipano lexi nga tivekiki, laha vanhu vo hlaya a va nga xi langutelanga leswaku xi nga fika eka tifayinali hambi ku ri ku hlula xidlodlo lexi.
Va tirhile hi ku tiyimisela eka mphikizano va nga si ya hlula Dzingidzingi Brazil ku hetisisa ku hlula eka xidlodlo loku a ku nga languteriwanga, laha va nga tibukutela ntsengo wa R55,000. Kasi Dzingidzingi Brazil, yi tikumele R39,000 tanihi xipano lexi hluriweke eka tifayinali.
Eka mudzaberi wa Secha-Six Mido Mhlongo, xiyimo xa xipano ku va xi nga tiveki a swi nga va veki eka ntshikelelo, swin’wana swa leswi endleke leswaku va humelela. “Eka ntlangu wa bolo ya milenge, swi kahle ku va mi ri xipano lexi nga tivekiki hikuva kuhava ntshikelelo tanihileswi ku nga riki na munhu loyi a mi languteleke leswaku mi hlula,” wa hlamusela.
Kuya hi Mhlongo, loko swipano swi va tekerile ehansi emasungulweni ya thonamete, vatlangi a va titshembha eka vswukoti bya vona. “Ehandle ka leswi vanhu a va swi ehleketa hi hina emasungulweni, a hi swi tiva leswaku hi na vatlangi va ntikelo wa le henhla. Leswi hi swona swi hi tirheleke,” ku vula yena.
Tifayinali leti a ku ri ndlela yin’wana yo tirihisela eka Secha-Six, endzhaku ka loko xipano xi hluriwile hi Dzingidzingi Brazil eka tisemi-fayinali ta 2024. Mhlongo u vule leswaku switsundzuxo swa ku hluriwa swi tlhele swi hlohletela vatlangi loko va hlangana na xipano lexi xi va hluleke eka tifayinali ta lembe leri.
“Leswi a ku nga ri ku hlula ntsena, hi ndlela yin’wana, a ku ri ku tirihisela eka ku hluriwa hi Dzingidzingi Brazil eka tisemi-fayinali ta 2024, leswi endleke leswaku vafana va hina va ta va hlohletelekile, va vula leswaku ‘vafana lava hi vona lava va hi hluleke hi 2024, hikokwalaho hi fanele ku lwa hi tirhisa hinkwaswo leswi hi nga na swona’” ku vula yena.
Ku hlula se swi cincile Secha-Six kusuka eka xipano lexi nga tivekiki kuya eka xipano xa ntikelo eka thonamete leyi landzelaka. Mhlongo u vule leswaku se u langutile emahlweni, laha a tshikeleleke leswaku xipano xakwe xi ta tlhelela eka thonamete ya lembe leri taka xi tiyimiserile ku sirhelela xidlodlo. “Hi ta vuya lembe leri taka ku sirhelela xidlodlo lexi, naswona ku endlela leswaku swilo swi hi olovela, hi fanele ku tiyisisa leswaku vatlangi va kuma mikavelo ya mali sweswi leswaku va ta hlohleteleka ku tlanga hi matimba loko va tlhelela kuya sirhelela xidlodlo lexi lembe leri taka,” wa engetela.
Kasi xipano lexi sunguleke thonamete xi nga ri na ntikelo, rendzo ra Secha-Six ku hlula eka xidlodlo lexi swi kombisa nkateko wo tekeriwa ehansi, dyondzo leyi swipano swo hlaya eka Khapu ya meyara swi nga ta dyondza eka xona.
Ends