“A NDZI TIRHISA MAFURA YO SWEKA EKA XITULU XA MAVHILWA”

Hi Themba Chauke

“Ndzi rhandza ku khensa meyara eka leswi a hi endleleke swona. Leswi swi fikile hi nkarhi wa kahle hikuva xitulu xa mavhilwa lexi a ndzi xi tirhisa se a xi hlakarile.” Ku hlamusela Dora Rikhotso, kokwa wa jaha ra malembe ya nhungu kusuka emugangeni wa le Mbawula, loyi a amukeleke xitulu xa mavhilwa kusuka eka Meyara wa masipala wa Giyani Thandi Zitha, hi nkarhi wa ntirho wa vandla ra ANC wo gangisa tivhoti emugangeni lowuya.

“A ndzi tirhisa mafura yo sweka ku chela eka xitulu xa mavhilwa leswaku xi kota ku famba. A swi ndzi tikela swinene ku n’wi phuxa loko a ya exikolweni, swi tlhela swi nyanya loko a fanele ku tifambisa hi yexe loko a fika exikolweni,” u ya emahlweni, laha a hlamusela ku tika loku ntukulu wakwe a hlanganaka na kona masiku hinkwawo hikwalaho ka xitulu xa mavhilwa lexa khale, lexi mavhilwa ya xona se a ma nonowha ku famba.

Rikhotso u vule leswaku xitulu xa mavhilwa lexintshwa xi ta endla leswaku a oloveriwa ku famba-famba ehandle ka mpfuno na kuya exikolweni. “Sweswi a ndza ha vileli leswaku u ta famba njhani exikolweni, tanihileswi a nga tifambisaka kahle kusuka ekaya kuya exikolweni ehandle ka mpfuno wa mina,” ku vula yena hi ku khensa meyara ku va a pfunile ntukulu wa yena

A hi swi vona leswaku xitulu xa mavhilwa lexa khale se a xi hlakarile, kambe hikokwalaho ka ku durha ka swilo, vutomi se bya tika, a hi nga ta swi kota ku fikelela yin’wana leyintshwa,” wa engetela.

Kasi meyara u vule leswaku xilaveko xa xitulu xa mavhilwa xi tile eka yena hi xipikara xa masipala Ernest Mboweni, loyi a kombeleke mpfuno “Hi hlengeletile mali ku xavela n’wana loyi xitulu xa mavhilwa lexintshwa,” ku vula meyara endzhaku ka ku nyikela xitulu xa mavhilwa.

Muyara u tlhele a kombela vun’we exikarhi ka swirho swa anc, laha a nga va hlohletela leswaku va nga tekelani ehansi kumbe ku dyanana swirhendze hikwalaho ka ku hambana hi mavonelo ya xipolitiki, ngopfungopfu loko va ri ku gangiseleni ka tivhoti ta vandla. U vule leswaku swirho swa ANC swi fanele swi veka ku hambana ka swona etlhelo na ku seketela munhu un’wana na un’wana loyi a tirhelaka nhlangano.

U vule leswaku ku hambana ka mavonelo a swi fanelanga ku pfumeleriwa leswaku swi tsanisa matshalatshala ya vandla yo gangisa tivhoti, laha a nga tshikelela leswaku swirho swi fanele ku twanana loko swi ri eku tirheni emigangeni.