VAAKI VA VILERISIWA HI MATHOLELO
Hi Andrew Hlongwane
Kwalomu ka ntlhanu wa madzana wa vaaki vo huma eka miganga yo tlula khume a va hlengeletanile etigedeni ta laha ku akiwaku Molo wa Dan City, ehandlenyana ka doroba ra Tzaneen kuya kombisa ku vilela hi maka ya matholelo ya vanhu yo ka ya nga tshamisekangi.
Ku hehliwa leswaku tikomiti leti nga hlawuriwa ti nghenisile vamakwavo na vana va vona entirhweni.
Kambe kuya hi vaakatiko va kombisa leswaku komiti yi va tshembisile yi tlhela yi tiyisisa leswaku eka nkarhi wa sweswi ku thoriwile khume ntlhanu wa vanhu vo huma eka miganga akelana kambe loko va fika va kumile leswaku ku na vanhu vo hundza dzana va nga le ku tirheni.
Un’wana wa vaakatiko a nga murangeri, tatana Reagan Nukeri u hlamuserile phephahungu ra Nthavela leswaku a va chavi na kun’we.”Ku va va hi vitanela maphorisa a swi vuli leswaku hi fanele hi pfala milomu. Loko ku ri kufa kona a hi xiphiqo swa antswa hi fela ntiyiso leswaku na vaakatiko na vona va hetelela va vuyeriwile eka Molo wa Dan City. Hina a hi lwisani na nhluvukiso wa Molo kambe hi lwela leswaku vaakatiko van’wana va nghena emitirhweni va ta kota ku xavela vana va vona xinkwa”, ku vula Nukeri.
Eka xiyenge xa mabulo xa Whatsapp leti hi nga ti yingisela na hina va Nthavela hi kumile leswaku vurhangeri byo hlaya byi hehlana hi swo tala byi tlhela byi tshembisana swo ka swinga tshamisekangi.
Kambe un’wana w vavurhangeri bya Molo wa Dan City, tatana Mathonsi u komberile leswaku vaakatiko va nga tekeli swilo ehenhla kambe va fanerile ku swi endla hi nongonoko.”Swa ku vilela a hina xiphiqo na swona kambe mi fanele mi tsala papila leri mi tlhelaka mi hi pfumelela leswaku hi mi hlamula hi kwalomu ka masiku yo ringana nkombo kumbe makume mbirhi n’we. Leswi swi ta hi endla leswaku na hina hi kuma nhlamulo yo khomeka”, ku vula Mathonsi.
Molo lowu wa Dan City wu kombisa leswaku wu ta hela kwala ka lembe leri taka nakona wu endla kwalomu ka mabiliyoni nharhu ya tirhandi.
Nukeri u hetelele hi ku hehla leswaku kwalomu ka van’watikondiraka vo ringana vanharhu va le ku tirheni kambe a va kombisiwangi eka vaakatiko kuya hi leswi va nga twananisa xi swona.