QUEENS YI SIRHELELA XIDLODLO

Hi Themba Chauke

Swipano swimbirhi swa matimba swa le Giyani, a swi ombanile eka ntlangu wa Netball, erivaleni ra mitlangu ra Nkhuvutlo eGiyani, laha a swi phikizanela xidlodlo xa khapu ya Meyara. Ntlangu lowu a wu languteriwile hi mahlo ngati a wu ri exikarhi ka xipano xa Wadi 13 xa Queens na Wadi 12, lava tivekaka hi Vipers, eka ntlangu lowu a wu koka rinoko swinene eka vaseketeri va netball.

Ntlangu lowu wu sungurile hi ku hlwela hi kwalomu ka awara, laha swipano haswimbirhi a swi vilerisiwa hi ku tirhisiwa ka van’watipempe va laha kaya, laha swipano a swi vula leswaku ku thoriwa ka van’watipempe va laha kaya swi tisa ku kanakana eka mafambiselo lamanene ma ntlangu tanihileswi swipano haswimbirhi swi humaka emalokixini lama akelaneke. A va ri na swivilelo swa leswaku n’watimpempe wa le kaya a nga ha teka swiboho leswi nga vuyerisaka xin’wana xa swipano hi mavomu kumbe ku nga ri mavomu.

Nkwetlembetano lowu wu vuye wu lulamisiwa endzhaku ka loko van’watipempe lava nga le ka xiyimo xa rixaka lava a va tile ku ta hlalela ntlangu va tinyiketerile ku fambisa ntlangu lowu.

Queens na Vipers va tekiwa tanihi swipano swo tiya eka swipano swa netball eka thonamete, laha swipano haswimbirhi swi nga na matimu yo hlula eka Khapu ya Meyara. Nkoka wa ntlangu lowu wu vonakarile loko mpempe yo sungula ntlangu yi ba, laha swipano a swi nga tiyimiselanga ku nyika xin’wana xipano nkateko ta ha suka.

Xiphemu xo sungula xi kombisile ku va xi tika eka swipano haswimbirhi, laha vatlangi a va tikeriwa ku khoma rivilo ra ntlangu. Swipano a swi ringeta hi matimba ku papalata ku endla swihoxo.

Hambiswiritano, Queens yi vuye eku wiseni yi ri na ntshembho lowu pfuxelelekeke na matlangelo yo antswa swinene. Wadi 13 yi sungurile ku lawula ntlangu laha yi nga yisa ntshikelelo na ku tirhisa kahle mikateko leyi a yi yi kuma. Ehandle ka matshalatshala ya Vipers yo tilwela, Queens yi tlangile hi ndlela ya kahle loko ntlangu wu ya emahlweni. Loko mpempe yo hetelela yi ba, Queens a yi famba emahlweni hi 11-5, leswi endleke leswaku va sirhelela xidlodlo xa vona xa Khapu ya Meyara.

Ku hlula loku swi endlile leswaku Queens yi famba na ntsengo wa R30,000 tanihi tinghwazi ta thonamete. Kasi eka Vipers, ku hluriwa loku a ku khomisa tingana tanihileswi va ngheneke eka ntlangu va ri na ntshembho wo tirihisela eka xipano xa Queens lexi xi va hluleke lembe leri hundzeke eka tisemi-fayinali, leswi endleke leswaku va tsandzeka ku fika eka tifayinali.

Wadi 12 yona yi fambile na R23,000 tanihi xipano lexi hluriweke eka tifayinali. Vipers yi na matimu yo lawula mphikizano wa Khapu ya Meyara ku ringana malembe ya 10 va nga si vutleriwa swona hi Queens lembe leri hundzeke. Ku hlula ka Queens hi ku landzelelana se swi kombisa ndzimana yintshwa eka mphikizano wa netball eka thonamete, loko Vipers yi ta boheka ku rindzela lembe ku kuma nkateko nakambe wo lwela xidlodlo lexi va xi lawuleke nkarhi wo leha.