XIKOLO XA KOLOKOSHANI AMUKELA NYIKO

Hi Mapula Glashy Makoto

Xikolo xa henhla xa Kolokoshani ehandle nyana ka xidorobani xa Vuwani emugangeni wa Tshivhazwaulu eLimpopo, xi amukerile nyiko leyikulu vhiki leri loko khale ka mudyondzi Shonisani Rambau, a va nyiketa titlilasi ta nhungu letintshwa, leti nga na swilo hinkwaswo leswi durhaka kwalomu ka R18 miliyoni

Ntirho lowu wu vile kona hi ti 17 Ndzhati 2026 laha vanhu a va khapa mihloti hikokwalaho ka ntsako. Vadyondzisi, vatswari, vadyondzi na varhangeri vo fana na Meyara wa Makhado Dorcus Mboyi na Thovhele Princess Nesengani va nghenelerile eka ntirho lowu.

Rambau, loyi a nga endla todyondzo ta matiriki exikolweni lexi hi 1997 naswona sweswi u fambisa khamphani ya vumaki ya SR Construction, u sungule ku kunguhata ku aka titlilasi tantlhanu. Hi ku pfuniwa hi vaaki, ntirho lowu wu kurile wu va titlilasi ta nhungu.

Vatirhisani va nkoka va katsa SR Construction, Mont Consulting Engineers, na Corobrick, leyi nyikeleke hi 30,000 wa switina. Vantshwa va ndhawu leyi na vona va pfunetile hi ku rindza ndhawu leswaku yi nga onhiwi.

Rambau u thye buloko yin’we vito ra nhloko ya xikolo xa yena mufi, Mushavhi Thomas Mulungwa, a vula leswaku “u endlile swo tlula ku dyondzisa – u ake vanhu”.

Buloko yin’wana yi thyiwile vito ra nsati wa yena, Tintswalo, loyi a n’wi vitana “mbilu ya muti wa mina”. “Xikolo a hi switina ntsena – i xitshembiso,” ku vula Rambau.

Meyara Mboyi u vule leswaku ntirho lowu wu vulavula hi “ku pfuleka ka tinyangwa eka swilo hinkwaswo, xindzhuti na vumundzuku byo vangama eka vana va hina”, naswona u komberile vaaki ku sirhelela titlilasi letintshwa.

Nhloko ya xikolo Aron Manenzhe u nkhensile Rambau, a vula leswaku titlilasi letintshwa ti ta herisa ku tala ka vana no yimisa tidyondzo tin’wana leti a tikhomeriwa ehansi ka mirhi.