MULAVISISI A HLULA EKA MPHIKIZANO WA FAMELAB 

Hi Mapula Glashy Makoto

Dokodela Nthabiseng Mokoeng, mulavisisi wo huma eMintek, u hlurile eka mphikizano wa FameLab ya laha Afrika-Dzonga ya lembe ra 2026. Sweswi u ta ya yimela tiko ra Afrika-Dzonga eka FameLab ya matiko ya misava eKatowice, Poland.

Dok Nthabiseng u hlule mphikizano lowu hi ku humesa ndzavisiso lowu tirhisaka vutlhari bya khompyuta (AI) na ku kandziyisa hi 3D ku tumbuluxa switirhisiwa leswintshwa leswi nga pfunaka ku lwisana na mavabyi ya mbilu.

Ntirho wa yena wu kombisa hilaha thekinoloji na ndzavisiso wa swa vutshunguri swi nga tirhisanaka hakona ku antswisa rihanyo ra vanhu.

FameLab hi yin’wana ya miphikizano leyikulu ya vuhlanganisi bya sayense emisaveni hinkwayo. Valavisisi lavatsongo a va fanele ku hlamusela nhlokomhaka ya sayense hi timinete tinharhu ntsena, ehandle ko tirhisa swilayidi swa PowerPoint. Vaavanyisi va bumabumerile Dokodela Mokoeng hilaha a hundzuluxeke sayense leyi rharhanganeke yi va xitori xo olova lexi un’wana na un’wana a nga xi twisisaka.

Lava nga teka xiyimo xa vumbirhi na xa vunharhu a ku ri Lauren Johnston kusuka eYunivhesiti ya Nelson Mandela, loyi a nyikeleke ndzavisiso eka ku nyikiwa ka mimirhi leyi kongomisiweke eka vutshunguri bya mfukuzana, na Londeka Dube kusuka eYunivhesiti ya Afrika-Dzonga (UNISA), loyi a avelana hi ntirho wa ku tirhisa thekinoloji leyi simekiweke eka ku vonakala na tinanoparticles ku dlaya switsongwatsongwana ematini.

Vulavisisi bya Dube i bya nkoka hikuva byi nga pfuna miganga ku kuma mati lama tengeke ma tlhela ma basa, hikuva tindlela ta ntolovelo to dlaya switsongwatsongwana a ta ha tirhi kahle. Ku hlula ka Mokoeng i nhlohlotelo eka vantshwa eLimpopo na le tikweni ra Afrika-Dzonga hinkwaro. Swi kombisa leswaku valavisisi va laha kaya va nga tirhisa AI, 3D printing na switirhisiwa swin’wana swa manguva lawa ku tlhantlha swiphiqo leswikulu swa rihanyo.

Riendzo ra yena ro ya ePoland ri nga ha khutaza vadyondzi, ngopfu-ngopfu vanhwanyana na swichudeni leswi humaka etindhawini ta le makaya, ku dyondza tidyondzo ta sayense, thekinoloji, vunjhiniyara na tihlayo. Loko a fikile ePoland u ta tlhela a va na timinete tinharhu a humesa ndzavisiso wa yena eka vayingiseri va misava hinkwayo na ku kombisa matimba ya vutumbuluxi bya Afrika-Dzonga.