NSULAVOYA YI TLULA NA QULU EKRUGER.

Hi Themba Chauke

Maphorisa ya Limpopo ya khomile jaha ra malembe ya 18, endzhaku ka mhangu yo baleselana exikarhi ka vahloti va swiharhi na marhenja ya ntanga wa swiharhi wa Kruger en’walungwini wa ntanga, eXipala exifundzenintsongo xa Vhembe.

Mhangu leyi yi humelerile hi kwalomu ka 15h30, hi Ravumune vhiki leri hundzeke endzhaku ka loko maphorisa ya le Saselamani ya kumile xiviko xa ku baleselana exikarhi ka marhenja na vahloti va swiharhi ku suka entangeni wa swiharhi wa Kruger.

Ku landzela xilemukiso lexi, maphorisa ma hlengeletanile ya kongoma endhawini leyi ku vulavuriwaka hi yona, na lomu vaehleketeleriwa a va tsutsumela kona, ku ri matshalatshala yo landzelerisa na ku sivela leswaku tisulavoya ti nga baleki. Loko maphorisa ya fika, ya kumile muehleketeleriwa wa malembe ya 18 a etlele hikwalaho ka mbanga ya xibalesa enengeni. Ku tlhele ku kumeka na masalelwa ya nyarhi leyi ku vuriwaka leswaku yi durha kwalomu ka R80 000, leyi ku hehliwaka leswaku yi dlayiwile hi ku tirhisa mabanga.

Vulavisisi byo sungula byi kombisa leswaku muehleketeleriwa loyi a vavisekeke i xiphemu xa ntlawa wa swigevenga leswi a swi ri xiphemu xo hlota swiharhi. Ku vuriwa leswaku swigevenga swi sungurile ku balesela marhenja ya ntanga loko va twa va ri kusuhi, leswi endleke leswaku ku va na ku baleselana. Hi nkarhi wa ku baleselana, muehleketeleriwa wa malembe ya 18 u tlurile na qulu enengeni, loko van’wana vaehleketeleriwa vamune va dya ehansi hi nkarhi lowu maphorisa a ma nga si fika.

Ku kumeka ka masalelwa ya nyarhi swi kombisa hi ndlela leyi makhamba yo hlota swiharhi ya tirhaka hakona na le henhla ka swiharhi leswi vitanaka kwalomu ka R80 000. Ku tirhisiwa ka mabanga na swona swi ta wela ehansi ka vulavisisi bya maphorisa eka mhangu leyi.

Muehleketeleriwa loyi a vavisekeke u tsutsumiseriwile exibedlele kuya kuma vutshunguri ehansi ka vulawuri bya maphorisa, naswona u languteriwile kuya tivonakarisa emahlweni ka Khoto ya Majisitarata wa Saselamani ku nga ri khale, laha a nga ta ya langutana na swihehlo swo ringeta ku dlaya na ku hlota swiharhi.

Vulavisisi bya maphorisa byi ya emahlweni ku kuma mhaka leyi hi ku hetiseka xikan’we na ku hlota swigevenga swa mune leswi balekeke. Maphorisa ya kombela vaaki lava nga na vuxokoxoko lebyi nga ta endla leswaku swigevenga leswi swi khomiwa ku tihlanganisa na vona hi ku fonela Kaputeni Gerson Tshilande, eka 082 414 2989 kumbe maphorisa ya le kusuhi.