MEC A NYIKA VAAKI VUKORHOKERI 

Hi Mapula Glashy Makoto

Miganga exifundzenintsongo xa Mopani sweswi yi nga kuma vukorhokeri bya rihanyo nkarhi wihi na wihi, ninhlikani kumbe navusiku, endzhaku ka loko MEC wa Rihanyo wa Limpopo Eddie Maila a sungurile ku nyiketa vaaki vukorhokeri bya tiawara ta 24 eka titliliniki timbirhi.

Tliliniki ya Zanghoma eka masipala wa vaaki wa Tzaneen na tliliniki ya Shotong eka masipala wa vaaki wa Letaba ti ndlandlamuxiwile ku tirha vusiku na nhlikanhi. Goza leri i xiphemu xa makungu ya Ndzawulo ya Rihanyo ya Limpopo ku tisa vukorhokeri bya swa vutshunguri bya nkoka ekusuhi na vanhu, ngopfungopfu lava lavaka ku pfuniwa swa xihatla.

Vanhu vo tala etindhawini ta le makaya va famba mpfhuka wo leha leswaku va ya fika eswibedlele. Hi titliliniki leti tirhaka tiawara ta 24, vavabyi va nga kuma mpfuno eka swiyimo swa xihatla, swo fana na ku vaviseka, mavabyi ya xitshuketa ni swilaveko swin’wana swa rihanyo swa xihatla ehandle ko rindzela siku leri landzelaka.

MEC Maila, u vule leswaku ndzawulo yi lava ku tiyisisa leswaku ku hava vaaki lava nga sala endzhaku. “vaaki va fanele ku kuma mpfuno nkarhi wihi na wihi”. Ku simekiwa ka ntirho lowu etliliniki ya Zanghoma a ku ngheneriwile hi vayimeri va Huvo ya Vuhosi bya ka Nkuna, mukhanselara Maria Mola, nhloko ya Ndzawulo ya Rihanyo ya Mopani Dokodela Nkhensani Mongwe, vatirhi va swa rihanyo, na vaaki hi ku angarhela.

Etliliniki ya Shotong, vayimeri va Huvo ya Vuhosi bya ka Modjadji, Meyara wa masipala wa Vaaki wa Letaba Rosinah Ramalatso, tikhanselara, na vatirhela mfumo va rihanyo na vona va ve kona eka xiendlakalo lexi.

Titliliniki ti languteriwa ku antswisa mfikelelo wa vukorhokeri bya rihanyo eka vaaki va le Tzaneen na Letaba. Vaaki va khutaziwa ku tirhisa titliliniki eka vukorhokeri bya xihatla, kasi swiyimo swa xihatla leswikulu swi nga ha lava ku hundziseriwa eswibedlele.

Ndzawulo yi vula leswaku ku ndlandlamuxiwa loku i xiphemu xa matshalatshala ya yona yo anama yo antswisa mfikelelo wa nhlayiso wa rihanyo na ku tiyisisa leswaku vukorhokeri bya swa vutshunguri byi hlamula swilaveko swa vaaki.