NHWANA A KOMBELA MPFUNO KU HUMA EKA SWIDZIDZIHARISI

Hi Andrew Hlongwane

Dineo Malatjie i nhwanyana wa khume nhungu (18) wa malembe, nhwanyana wo xonga swinene a tlhela a languteka kahle.

Kambe loko va ku swa misava swa jika hi nga endla xikombiso hi Dineo nakona leswi se swi lava mpfuneto wa swikhongelo xikan’we na swa le mandleni.

Dineo u tinghenelerisile eka ntlawa wo dzaha swidzidziharisi malembe manharhu lama hundzeke endzhaku ka ku hundza emisaveni ka vatswari va yena.

Leswi swi endlile leswaku a tshika xikolo exikolweni xa le henhla xa Magoza a ri eka Giredi 10.

Dorothy Mohale wa makume nharu n’we (31) wa malembe, hi yena makwavo loyi a nga sala a ri mutswari kambe a nga ri na mupfuneti emutini wa ka vona eNkomanini kusuhi na le Nkowankowa ehandlenyana ka doroba ra Tzaneen kwala xifundzenikulu xa Limpopo.

Mohale u hlamusela leswaku u twa onge a nga tisunga loko a languta mhaka kumbe xiyimo lexi.

“Loko ndzi vona Dineo ndzi twa mbilu ya mina yi pfumala ntshamiseko. Dineo loko a sungula ku dzaha ndzi ringetile ku tihlanganisa kumbe ku kombisana na mhaninkulu, Jane Mohale lava na vona va nga eka xiyimo lexi nga tsakisiki kambe a hi humelelangi.

Dorothy u tivisile vavalangi va muganga hi xiyimo xa yena laha va nga teka goza kumbe ku huma pfhumba ro hlotana na Dineo lo yi a a ri na tin’hweti timbirhi a nyamalarile kumbe ku duka na rona.

Dineo u kumiwile emutini wun’wana emugangeni wa Lusaka laha ku nga huma majaha yo hundza manharhu endlwini yo kala vatswari.

Hi ri swin’we (Nthavela), Dorothy na vavalangi hi kotile ku yisa Dineo eXibedlele xa Lataba laha ku nga endliwa xikombelo xo yisa Dineo endhawini ya vutshunguri byo basisa munhu eka mitolovelo yo biha kumbe rhihebu.

Kambe xiphiqo i ku ku laveka mali yo ringana R3000.00 hi n’hweti loko Dineo a hola mudende wa R1 200.00 yo hlayisa vana vo pfumala vatswari.

Xivutiso i ku yin’wana yo tatisela yi ta kumeka kwihi nakona nhlamulo ku ta hlamula mani loko ku nga ri Dorothy loyi a pfumalaka na xixevo endzeni ka xigwitsirisi.

Ku hlamuseriwa leswaku Dineo u tlharihile swinene loko swi ta eka swa tibuku kumbe eka timhaka ta xikolo.

Dineo u hlamuserile leswaku u tsakela goza ra Dorothy hikuva na yena wa swi lava kambe u hava mutsundzuxi.

“Ndzi tsakela ku tlhelela exikolweni loko ndzo tshika swidzahadzaharisi. Ndzi navela ku heta xikolo ndzi ya dyondzela ku va muyimeri wa swa nawu kumbe ndzi va muteki wa mahungu”, ku hlamusela Dineo a ri karhi a hlekelela.

Musamariya wa xikwembu loyi a tsakelaka ku pfuna a nga tihlanganisa na Dorothy eka nomboro ya riqingo kumbe WhatsApp eka 081 856 6444 kumbe Jane eka nomboro ya riqingo ya 072 641 5699.

Dorothy na Jane va tsakela ku pfuniwa hi xin’wana na xin’wana.