ADS YI HAVAXERIWA XIDLODLO

Xipano xa bolo ya milenge xa ADS xi havaxeriwile xidlodlo xa ligi ya vantshwa leyi tivekaka tanihi Youth Premier League (YPL), endzhaku ka ku hlula xipano xa Eleven Stars 2-0, eka mitlangu ya mukhumula jesi leyi a yi tlangeriwa erivaleni ra mitlangu ra ka Xikukwani hi mahelo ya vhiki. Mitlangu leyi a yi khomiwile hi Mugqivela na Sonto, leswi a swi katsa swipano swa melembe ya le hansi ka 13, 15, na 17, leswi a swi lwela swidlodlo eka swiyenge swa swona.

 Eka mudzeberi wa ADS Thembi Ndlovu, mudzaberi wa xisati ntsena eka ligi, ku hlula swi kombisa ku boxeketa endzhaku ka malembe yo hlaya va tikeriwa ku wela eka swipano swa le henhla. “Kusukela loko ligi yi sungurile hi lembe ra 2016, a hi si tshama hi gimeta hi ri emaninginingini ya ligi, eka swiyimo swo fana na xanharhu, xambirhi ndzi nga vuli xan’we. A hi si tshama hi bukuta nchumu kusukela loko ligi yi sungurile hi ku komisa. Va fana lava va ndzi endlerile siku,” ku vula yena.

Hambileswi va hluleke hi 2-0. Ndlovu u tshembha leswaku xipano xakwe a xi fanele ku va xi hlurile hi swikoro swa le henhla endzhaku ka ku tsandzeka ku howisa eka mikateko yo hlaya leyi va yi kumeke eka xiphemu xo sungula. U vule leswaku emasungulweni a ehleketa ku byela vatlangi va yena ku sirhelela xikoro xa vona kambe a cinca mieheleketo a va byela leswaku va ya emahlweni va hlasela. “Leswi swi vuye swi tswala mihandzu hikuva swi endlile leswaku hi kuma xikoro xa vumbirhi, leswi vekeke vaphikizani va hina eka ntshikelelo wa le henhla,” wa hlamusela.

  Ndlovu u vule leswaku ADS yi lava ku tlhelela eka nguva leyi taka na vatlangi vo hlaya lava nga va xiphemu xa tinghwazi ta nguva leyi, hambileswi vambirhi vanharhu va nga ta sukela xipano kuya eka xipano xa malembe ya 17 hikwalaho ka malembe ya vona.

  Kasi puresidende wa SAFA ya Xifundza xa Mopani Vincet Ramphago u tivisile leswaku tinghwazi ta malembe ya le hansi ka 17 ti ta va na nkateko wo ya phikizana eka mphikizano wa tiko wa Engine, laha va nga ta ya hlangana na swipano leswi hluvukeke swa PSL swo fana na Mamelodi Sundowns, Orlando Pirates na Kaizer Chiefs.

   Ramphago u hlohleterile vatlangi ku lulamisela maphepha yo fambafamba hi wona laha a vuleke leswaku xipano xi ta pfuna hi tihakelo ta swifambo na tin’wana tihakelo leti lavekaka. “Loko a ndzi ri n’wina, a ndzi ta sungula ku endla swikombelo swa mapasi na tiphasipoto sweswi leswaku loko nkarhi wu fika, swilo hinkwaswo swi va swi tshamisekile. Lowu i nkateko wa kahle hikuva mi ya tlanga na swipano leswi nga le hansi ka nhluvukiso wa swipano swo fana na Mamelodi Sundowns, Orlando Pirates na Kaizer Chiefs,” wa gimeta.

 Mphikizano wu ya nyika nkateko eka vatlangi va ADS ku tikambela ehenhla ka swipano swa vantshwa va swipano leswi hluvukeke xikan’we na ku kota ku koka rinoko eka vahloti va vatlangi va swipano swa le henhla swa ka PSL.