RIVALA RA MITLANGU RI PFURIWA XIMFUMO

Hi Mapula Glashy Makoto

Vaaki va le Elim na miganga ya le kusuhi eLimpopo, va nga sungula ku tirhisa rivala ra mitlangu ra Waterval leri a ri rindzeriwile hi mahlo ngati endzhaku ka loko masipala wa vaaki wa Makhado wu ri nyikerile ximfumo hi Ravuntlhanu, 09 Nhlangula 2026.

Vumaki lebyi byi durhile kwalomu ka R55 wa timiliyoni naswona swi tekile kwalomu ka khume ra malembe ka ha akiwa endzhaku ka loko ku sunguriwile ku akiwa hi lembe ra 2016.

Meyara wa masipala wa Makhado Dorcus Mboyi, u kombele ku rivaleriwa eka vaaki hikwalaho ka ku hlwela ka phurojeke leyi tekeke malembe yo tala. U vule leswaku masipala a wu nge he pfumeli leswaku tiphurojeke to fana na leti ti teka nkarhi wo leha eka mikarhi leyi taka.

Rivala ra mitlangu ri na switulu swa 2,000, rivala lerikulu laha ku nga ta tlangeriwa bolo ya milenge kumbe ku tlanga mitlangu yin’wana yo fana na ku tsutsuma, thenisi, netball, basketball na volleyball.

Ri tlhela ri va na tikamara to cincela eka tona, swihambukelo, ndhawu yo paka timovha, mati yo boriwa, rinhlapfu na ndhawu yo tlangela mitlangu ya ndzhavuko yo fana na chess na murhavarhava.

Meyara Mboyi u komberile vaaki ku sirhelela rivala leswaku ri nga onhiwi, mudzaberi wa bolo ya milenge wa laha kaya Vhutshilo Sydwell Phuravhathu u amukerile ndhawu leyi naswona u vule leswaku vaaki va fanele ku yi hlayisa yi tshama yi basile va tlhela va yi hlayisela vatukulu va vona.