QUEENS YI LAVA NSEKETELO

Hi Themba Chauke

Xipano xa ntlangu wa Netball, xa Queens, lexi xi humeleleke eka thonamete ya khapu ya meyara lembe leri, xi le makungwini yo hlengeleta mali ku xi pfuna eka vatlangi lavatsongo lava hlawuriweke ku teka xiave eka mitlangu ya netball eka mphikizano wa rixaka lowu languteriweke ku khomeriwa eDurban lembe leri taka.

Xipano xi kombela vanhu, van’wamabindzu xikan’we na vaseketeri ku pfuna vatlangi va vuswikoti lava humaka emindyangwini leyi sweleke lava nga kotiki ku fikelela tihakelo leti lavekaka eka ku teka xiave eka mphikizano wa rixaka.

Tanihi xiphemu xa pfhumba ro tlakusa nkwama, Queens a yi khomile siku ra nkombiso hi ku tirhisana na Molo wa Masingita, laha a ku xavisiwa mathikithi yo hlawula muhluri, ku kombisiwa ka swiambalo swintswa swa xipano na ku hlohletela vaaki ku titsarisela ku nghenelela eka ntlangu.

Matsalani wa xipano xa Queens Siphokazi Primrose u vule leswaku nkombiso a ku ri ku tlhela va simeka ntirho lowukulu wa nkombiso lowu nga ta va kona hi siku ra 28 Hukuri 2026, loko xipano xi ta tlanga ntlangu erivaleni ro paka timovha ra molo, tanihi xiphemu xo tlakusa nkwama.

U vule leswaku mathikithi a ma xavisiwa hi R50 ha rin’we naswona ku ta hlawuriwa muhluri hi siku ra 28 Hukuri. Kuya hi Primrose, vatlangi va 12 na swirho swinharhu swa vadzaberi va xipano va hlawuriwile kuya eka mitlangu ya rixaka. Xipano xi tshembha leswaku xi ta kota ku hlengeleta mali leyi ringaneleke ku fikelela swifambo, byetlelo na switirhisiwa swo hlamba eka swin’wana.

U vule leswaku vatlangi lava hlawuriweke va na ntokoto swinene kambe va na mitlhontlho ya swa timali leswi nga va sivelaka ku teka xiave eka mphikizano. Primrose u kombela vaaki na van’wamabindzu ku seketela pfhumba, laha a vuleke leswaku minyikelo ya vona yi ta nyika vatlangi lavatsongo nkateko wo yisa emahlweni migingiriko ya vona ya swa mitlangu.

U yile emahlweni a vula leswaku ku seketela vanhwanyana leswaku va nghenelela eka mitlangu swi tlhela swi va pfuna ku tinghenelerisa eka migingiriko leyinene va hambana na mitlhontlho yo fana na ku tirhisa swidzidziharisi na ku tika va ha ri lavatsongo.

Primrose u khensile vanhu lava se va seketeleke pfhumba a tlhela a kombela vanhu vo hlaya ku hoxa xandla eka ku pfuna vatlangi lava hlawuriweke kuya yimela xipano eka mphikizano wa rixaka. Ntirho wa ti 28 Hukuri wu ta tlhela wu nyika nkateko nakambe eka vaaki ku seketela xipano eka matshalatshala ya xona yo tlakusa nkwama na ku hlohletela nhluvukiso wa netball eka vantshwa.