WANSATI NA VANA VA WELA HI KHOMBO

Hi Andrew Hlongwane

Hi mikarhi yo fana na leyi, mutswari un’wana na un’wana u twa onge nhloko ya duma hambi ku ri ku pfuleka ka misava a nghena ka naveriwa hikuva vana va lava tipahla ta ku bomba hi tona, ku laveka na swakudya swa xiyimo xo antswa swa khisimusi loko swa tiyunifomo ta xikolo swi yimile erivantini.

Kambe Adeline Nkhwashu wa makume mune nharhu (43) wa malembe, wo huma eZanghoma kusuhi na le Letsitele ehandlenyana ka doroba ra Tzaneen kwala xifundzakulu xa Limpopo a nga si twisisa leswaku i swa nhoro kumbe i ntiyiso leswi nga le matihlweni ya yena.

Nkhwashu i manana wo tihluphekela hi ku tikurisela vana va yena vambirhi a ri yexe.

Hambiswiritano ndzilo wa mona wu tlhele wu hetisa leswitsongo a a ri na swona.

Nkhwashu u hlamuserile Nthavela leswaku a nga ri kona loko a twa mpongo ra vanhu va munganga hi tlhelo ra laha a tshamaka kona.

Ku tsutsuma ka yena a ka ha pfunangi nchumu – u hlanganisiwile hi musi wu huma eka yindlu ya yena.

Hi loko a twisisa leswaku wa ha ri hava nchumu ku sukela eka swakudya, tibuku ta vana va xikolo, swiamabalo hambi ku ri swo funengeta, ko tlela kona a hi nge hlamuseli hikuva ku sale ku lo hohlo.

Hambileswi vaakatiko va nga ringeta ku lwisana na ndzilo lowu a wu tibyerile ku heta yindlu ya yena ya mune wa tikamara na nhundzu, va kotile ku humesa switulu ntsena loko nhundzu hinkwayo ya le ndlwini yi helele kwalaho.

Sweswi Nkhwashu na vana va yena vambirhi un’we wa khume ra malembe na un’we wa tsevu wa malembe va hava ka ku tlela na swakudya. Hambiswiritano vaakatiko va ringeta ku va na yena emitini ya vona loko ka ha yimeriwile musamariya wa xikwembu loyi a nga ta kota ku phalala eka xiyimo lexo vava.

Van’wamabindzu hambi ku ri un’wana na un’wana loyi a tsakelaka ku pfuna Nkhwashu hi swo aka, swakudya, swa ku ambala hambi ku ri swin’wana na swin’wana leswi nga ta tisa ku hambana evuton’wini bya Nkhwashu na vana va yena a nga bela riqingo eka nomboro leyi landzelaka 078 653 8217 kumbe 0729373739.