Mpuru a ba mapiano…

Hi Andrew Hlongwane

Nice Mpuru wa makumembirhi-nhungu wa malembe i qambi leyi yi nga tiyimisela loko swi ta eka swa vunanga.

Mpuru u velekiwile emugangeni wa ka Hovheni, eJulisburg ehandlenyana ka doroba ra Tzaneen kwala xifundzankulu xa Limpopo.

Mpuru u wele eka swa vunanga a ri na khume-nkombo wa malembe endzhaku ko hlohloteriwa hi va malume va yena, Colly Mparhuke nakona a va tshama emugangeni wun’we.

Hi nkarhi wa kona, Mpuru u vile munhu wo rhandza kumbe ku tshamela ku chaya swichayachayani ku fikela rirhandzu ra swa vunanga ri aka swinene embilwini ya yena.

Kambe a nga sungulanga hi swa vuyimbeleri, a ku ri na nyiko yin’wana a yi tumberile ya misawu.

Loko a sungula ku hungasa kumbe ku hlekisa vanhu hi misawu ya yena Mpuru a ri na khumenkombo wa malembe.

Kambe swa misawu swi tekile malembe ma nharu ntsena ku nghenelela eka swa vuyimbeleri ku nga swa vunanga.

Mpuru u hlamuserile leswaku leswi nga endla ku ri a hambana na swa misawu hikuva misawu yi lava vanhu vo hlaya ku humelerisa ntirho, kambe nkandziyiso wa swifaniso wu kona nakona vanhu va n’wana va khola loko va nghenelela eka swin’wana va nga ri na nyiko ya kona.

“Kambe eka vuyimbeleri ndzi kota ku chaya na ku yimbelela xikan’we na ku humelerisa ndzi ri ndzexe”, ku vule Mpuru.

Mpuru u humesile alibamu ya mapiano leyi yi nga na makhumembiri wa tinsimu.

Alibamu leyi yi humelerisiwe hi Tyser SA na tiqambi tin’wana ta le kusuhi na Mpuru.

Alibamu leyi ya mapiano yi na tinghoma to hisa swinene to fana na Tima Lebone, Oooh my God na tin’wana.

Kambe Mpuru u kumeka a laviwa emintlangwini ku ya tsakisa vahlaleri hi vunanga bya yena kambe u ri xiphiqo hi ku vanhu a va hakeli.

Kambe xivutiso xa Mpuru hi ku munhu u ta humelela njhani loko vanhu va tsandzeka ku hakela ku ya hi mpfumelelano.

“Eka swa vuyimbeleri ndzi dyondzile leswaku i rendzo ro leha nakona ri lava mbilu na ku tiyisela leswaku ntirho wa wena wu ta tivulavulela. Xitsundzuxo eka tiqambi tin’wana hi ku a hi tidyondziseni ku hlangana na tiqambi ta khale hi tirha na tona leswaku hi ta dyondza hi ta va na ntokoto”, ku vula Mpuru.