Rihanyo ra Limpopo: Ku tholiwa Vaongori, Madokodela vatshwari exifundzheninkulu
LIMPOPO – MEC wa Rihanyo eLimpopo Dokodela Phophi Ramathuba u amukerile ku thoriwa ka vaongori, madokodela, na vakhemisi vantshwa ku ri ndlela yo tiyisisa vukorhokeri bya masungulo eka xifundzankulu.
Xikongomelo xa goza leri i ku tiyisisa leswaku vaaki va le Limpopo va Kota ku fikelela mpfuno wa rihanyo wa xiyimo xa le henhla. Ndzawulo yi vule leswaku lexi i xinwana xa xiphemu xa matshalatshala ya yona lamakulu.
Vaongori, madokodela, na vakhemisi va ta nyika vukorhokeri eka ndhawu ya nhlayiso wa le henhla na ku tirha tanihi buloho exikarhi ka vaaki na Ndzawulo ya rihanyo.
Ndzawulo yi vule leswaku, vatirhi lavantshwa va ta tlhela va nyika nseketelo eka vatirhi va rihanyo lava nga kona, notlhela va pfuneta eka ku tiyisisa leswaku swiyimo swa le henhla swa nhlayiso swa hlayisiwa.
Muvulavuleri wa ndzawulo ya rihanyo eLimpopo Neil Shikwambana u vule leswaku, MEC wa Rihanyo wa Limpopo, Dr. Phophi Ramathuba u amukerile vaongori va vukorhokeri bya vaaki, vakhemisi na madokodela ya swa Vutshunguri.
“Swiyenge leswi swi katsa Vaongori va Vukorhokeri bya Vaaki: 170, Madokodela: 253, na 64 wa Vukorhokeri bya Vaaki,” ku vula Muvulavuleri wa Ndzawulo ya Rihanyo eLimpopo Neil Shikwambana.
“leswi swi ta pfuna ku antswisa mfikelelo wa nhlayiso wa rihanyo wa xiyimo xa le henhla, ngopfungopfu eka xiyimo xa nhlayiso wa rihanyo wa le Hansi eka tindhawu ta le makaya laha Ndzawulo yi sungulaka pfhumba ro tiyisisa leswaku titliliniki ti nyika vukorhokeri bya tiawara ta 24,” Shikwambana u engeterile.
