Mudyondzisi Wa Xisati Wa Malembe Ya 50 Hi vukhale U Kumiwe A Lovile eGiyani
GIYANI – Vaaki va Giyani va le ku hlamaleni endzhaku ka loko mudyondzisi wa xisati wa makume ntlhanu wa malembe hi vukhale a kumiwile a lovile emugangeni wa Vuhehli, ehandle ka Giyani, hi Musumbhunuku.
Maphorisa ya Giyani, ya le ku lavisiseni ka mhangu leyi, leswi nga siya vaaki va ri karhi va rhurhumela.
Muhlaseriwa u tiveka tani hi Nkhensani Dorries Maswanganyi (50). Xivangelo xa rifu a xi se tiveka, naswona maphorisa ya Giyani ya kombela un’wana na un’wana loyi a nga na vuxokoxoko kuva luma ndleve.
Nhloko ya xikolo xa le hansi xa Vuhehli yi tihlanganisile na makwavo wa mufi endzhaku ko xiya leswaku mundyondzisi Maswanganyi a nga ri kona entirhweni handle ko hlamusela naswona riqingho ra yena a riva yisa eka voicemail.
Hi ku ya hi Sejeni Ridgewell Rikhotso kusuka ka xitichi xa Maphorisa xa Giyani, nhloko ya xikolo yi vutisile makwerhu loyi leswaku sesi wa yena u kwihi.
“Hi Musumbhunuku, March 13, 2023, kwalomu ka 8:30 a.m., nhloko ya xikolo xa le hansi xa Vuhehli yi tihlanganisile na makwavo wa mufi kutani yi n’wi vutisa leswaku sesi wa yena u kwihi endzhaku ka loko a tsandzekile kuya entirhweni,” ku vula Sejeni Ridgewell Rikhotso.
“Makwerhu loyi a vhetile a kongoma ekaya ra sesi wakwe leswaku a ya n’wi lava, kutani loko a fika, u xiye leswaku gede ya ha lotleriwile (khiyiwa), kambe nyangwa wa kamara rakwe ro etlela eka rona a ri pfuriwile naswona fasitere a ri tshovekile (kufayeka),” ku engetela Rikhotso.
Rikhotso u ye emahlweni a ku, A nga si nghena ekamareni, u twile ku nun’hwela loku nga tolovelekangiki, loko a nghena endzeni, u kume sesi wa yena a etlele ehenhla ka mubedo naswona a hundzile emisaveni.
“Maphorisa ya vitaniwile endhawini ya mhangu, laha ya nga pfula dokheti ya nandzu,” ku gimeta Rikhotso.
Xivangelo xa rifu a xiseva erivaleni eka karhi wa sweswi.
