Vhiki Ri Hela, Vaaki Va Ri eXinyamini

Hi MKATEKO NDLOVU

Ku onhaka ka thirasifoma swi siyile vaakatiko va hlundzukile swinene. Hi siku ra ti 5 Nyenyankulu Vaaki va le Matshamahinkani etiD emugangeni wa ka Xikundu va  weriwile hi thirasifoma ya gezi. Vaaki va mangarile mhaka leyi eka mukoma, laha mukoma a nga mangala mhaka leyi eka mukhaselara wa wadi 28.

Mukhaselara u tshembhisile vaaki leswaku u ta mangala mhaka leyi eka Eskom naswona u ta tshunela endhawini leyi ku nga wa thirasifoma. Vaaki va kombisa leswaku hi ti 6 Nyenyankulu, mukhaselara u yi le eka ndhawu leyi ku nga wa thirasifoma ku ya tiyisisa leswaku hakanene thirasifoma yi wile.

Kusuka kwalaho, ku rhambiwile nhlengeletano ya muganga hi nhlangano wa vaaki wa Sanco laha vaaki va nga huma hi xitalo. Kasi eka nhlengeletano lowu, vaaki va hehlile mukhaselara hikuva a nga mangalanga mhaka leyi eka Eskom. Hambiswiritano phephahungu ra Nthavela ri tihlanganisile na mukhaselara tatana Joseph Mabasa ku twisisa hi mhaka leyi.

Mabasa u angurile a ku: “Mina mhaka ya gezi ndzi mangarile eka Eskom naswona ndzi komberile ku teka vaaki van’wana lava nga weriwa hi thirasifoma ndzi famba na vona eka Eskom ku ya tiyisisa na ku kombisa vaaki leswaku hakanene mhangu yi mangariwile. Loko vaaki va fika va vulavurile na va ka Eskom kutani va ka Eskom va tiyisisa leswaka mhangu yi mangariwile hi siku leri ku nga twananiwa hi rona’’.

Vaaki va komberile va ka Eskom ku endla matshalatshala yo lunghisa thirasifoma hi nkarhi lowunga hetiki mbilu hikuva ku hanya ku nga ri na gezi a swi olovi naswona swixevo se a swi sungula ku onhaka endzeni ka swigwitsirisi. Vaaki va kombisa leswaku thirasifoma leyi nga wa ya va chavisa hikuva a yi ri na ndzilo naswona yi nga vanga nghozi eka vana.’’

Hi hanya hi ku chava hikuva hi ehleketa leswaku vana va tlangela eka thirasifoma hi nga swi voni” ku vula un’wana wa vaaki.