Chabane a Tsundzukiwa.

Hi Mkateko Ndlovu

Hi ti 15 ta Nyenyankulu nhlangano wa Collins Chabane Foundation wu kunguhatile ntirho wo tsundzuka nhenha Collins Chabane loyi a ri khale ka Holobye eka hofisi ya puresidende wa tiko. Ntirho lowu a wu khomeriwile ekaya ra yena emugangeni wa ka Xikundu. Chabane u hundzile emisaveni hi lembe ra 2015 eka nghozi yo chavisa ya movha, ku katsa na varindzi va yena va Mbirhi Lesiba Seleke na Lawrence Lentsoane leswi se swi nga na Khume ra malembe va hundzile emisaveni.

Va Collins Chabane foundation xikan’we na vandyangu va sungule nitrho hi ku ya laha nghozi ya movha leyi nga koxa vutomi bya yena yi nga humelela kona. Kusuka kona, va yile eswirhapeni laha a nga vekiwa kona ku ya vekela swiluva ku ri ndlela ya ku n’wi tsundzuka. Loko va hetile ku vekela swiluva va sukile va ya ekaya ra yena ku yisa emahlweni ntirho.

Hi nkarhi wa nongonoko, swivulavuri swotala swi yimile swi tsundzuka xikan’we no tlangela vutomi bya nhenha. Kasi vandyangu a va yimeriwile hi manana Ellah Chabane, loyi a nga kombisa leswaku Chabani a ku ri nhenha naswona a ku ri muhlanganisi wa vanhu eka ndyangu wa ka Chabane . U vule lewaku mintirho ya yena va ta tshama va yi tsundzuka na ku yi tlangela hi masiku.

Vana na vona va nyikiwile nkarhi wo vulavula hi tatana wa vona laha va nga kombisa leswaku ku hundza emisaveni ka tata wa vona swi tisile ku cinca hikuva hi yena loyi a va nyika switsundzuxo swa vutomi eka swilo hinkwaswo loko va nga se teka goza a va sungula va kombela switsunduxo eka tata wa vona. Va vule leswaku tata wa vona u va dyondzisile ku rhangisa Xikwembu eka swilo hinkwaswo leswi va swi endlaka evuton’wini. Va yile emahlweni va hlamusela leswaku tata wa vona u va dyondzisile hi nkoka wa vuxaka na vunghana.

Va Collins Chabane foundation na vona va nyikile mbulavulo hi ku yimeriwa hi Buti Manamela laha a nga bumabumela nhenha Chabane, a kombisa leswaku chabane a ku nga ri n’watipolitiki ntsena kambe a ku ri muhlanganisi, muyimbeleri naswona a ri mutirhela mfumo. Manamela u kombisile leswaku Chabane u wela eka ntlawa wa vanhu lava nga lwela ntshuxeko kambe a nga lwelangi
ntshuxeko ntsena, u tlangile ndzima yikulu eka ku lwisana na xihlawuhlawu laha tiweni.

U tlhele a kombisa leswaku Chabane a ri munhu loyi a rhandza ku tirha hi matimba swinene eka swilo
hinkwaswo leswi a swi endlaka naswona mintirho leyi a nga yi siya yi fanele ku sala yi yisiwa emahlweni. Kasi va Collins Chabane Foundation, va vonile swi fanerile leswaku va tlangela vutomi bya nhenha va vula leswaku va vona swi fanerile ku yisa emahlweni ndzhaka ya yena.

Loko ku ri mintirho na vutlharhi bya yena a va nga swi yisi emahlweni ntsena kambe va ta swi hlayisa tanihi
matimu lawa ya nga ta tirha eka switukulwana swa nkarhi lowutaka.

‘’swi na Khume ra malembe nhenha yi hundzile emisaveni naswona hi lahlekeriwile tanihi hi vandla
ra ANC, Collins chabane u sukile ekaya ra yena a ya lwela ntshuxeko hikwalaho ka sweswo tanihi
vandla ra ANC hi ta tshama hi khensa mintirho leyinene Chabane a yi endleke. Hi khensa va Collins
Chabane foundation kuva va endlile ntirho lowu wo saseka na ku hlonipha ndhzaka ya Collins
chabane’’ Xandla xa holobye wa ndzawulo ya Xikaya Njabulo Nzunza wa hlamusela.