Meyara a Seketela Nsuku wa Big Brother

Hi MKATEKO NDLOVU

Meyara wa masipala wa Collins Chabane Tatana Shadrack Maluleke, u simekile pfhumba ro seketela Nsuku Mabunda, loyi a nga nghenela mphikizano wa Big Brother laha tikweni. Nsuku i wanhwana wa MakumeMbirhi-Nkaye wa malembe hi vukhale loyi a humaka emugangeni wa ka Nkuzana. Mphikizano wa Big brother wu tlanga eka mavonakule masiku yo ringana 72, naswona i mphikizano lowu ngheneleriwaka hi 24 wa vanhu laha ku faneleke ku sala munhu u’nwe loyi a nga ta tibukutela ntsengo wa R2 wa timiliyoni.

Wanhwana loyi u kotile ku wela eka Ntlhanu wa vanhu lava nga kota ku fikelela evugimamusi bya mphikizano endzhaku ka loko ku humile vanhu vo ringana Khume Nkaye. Hambiswiritano ku kota kuva muhluri eka mphikizano lowu, munhu u fanele ku seketeriwa hi vanhu hi ndlela yo vhoteriwa.

Meyara wa masipala wa Collins Chabane, Cllr Maluleke, u kombela vaaki leswaku va seketela Nsuku hi ndlela ya ku n’wi vhotela leswaku a ta humelela eka mphikizano lowu. Meyara u yi le emahlweni a hlamusela leswaku tanihiloko vaaki va kotile ku seketela Shudufhadzo eka gondzo ra yena ra kuva n’wambhurhi vaaki a va nge tsandzeki ku seketela Nsuku.

Meyara u hlamusele leswaku mapfhumba ya muxaka lowu, ya na nkoka leswaku vaaki va nghenelela eka wona hikuva ya hlohlotela vantshwa leswaku va humesela erivaleni xikan’we no kombisa tinyiko ta vona. U vule leswaku u ni ku tshemba leswaku loko vanhu vo hlangana va va nyandza yin’we va nga kota ku humelerisa milorho ya wanhwana, laha a nga kombisa leswaku Nsuku u suka kule ngopfu na rendzo leri naswona a swi fanelanga leswaku vaaki va lahla thawula sweswi.

Vaaki vo tala kusuka eka swifundzhankulu swo hambana-hambana va tinyiketerile ku seketela Nsuku. Eka swiyenge swa mabulo vanhu vo tala va avelana hi swithombhe swa Nsuku ku ri ndlela ya ku n’wi komba rirhandzu na nseketelo. Kasi loko ku ri Makhadzi, xiyimbeleri xa ndhuma na yena hi un’wana loyi a kombisaka ntsakelo wa swithombhe swa Nsuku eka swiyenge swa mabulo ku ri ndlela ya ku n’wi seketela.

Vaaki va le mugangeni wa ka Nkuzana laha Nsuku a humaka kona na vona va simekile mapfhumba yo famba hi muti na ximutana va kombela van’wana vaaki leswaku va seketela Nsuku eka mphikizano wa Big Brother.

Phepha hungu ra Nthavela ri kotile ku fikelela vandyangu wa ka Mabunda laha hi nga burisana ni makwavo wa Nsuku loyi a nga kombisa leswaku: “Tanihi ndyangu wa ka Mabunda a hi nga swi ehleketi leswaku Nsuku a nga hi veka emaninginingini, a hi nga switivi leswaku Nsuku wa rhandziwa hi vanhu, naswona hi khensa ku
seketeriwa hi vaakatiko loko va ri karhi va simeka mapfhumba ya ku vhotela Nsuku hikuva tanihi vandyangu a hi nga switivi leswaku hi ta swi endlisa kuyini hikuva ku ya hi nawu wa Big Brother a hi pfumeleriwi ku simeka mapfumba yo vhotela Nsuku’’ Ronewa Muthivha wa hlamusela.