GIYANI ROTARY CLUB YI XIXIMA MUFAMBISI

Themba Chauke

Giyani Rotary Club, yin’wana ya mihlangano leyi pfunaka vaaki a va khomile nhlengeletano ya xiyimo xa le henhla endhawini ya vuwiselo ya Xisaka eGiyani ku xixima xiave lexi hoxiweke hi khale ka puresidende wa nhlangano Rex Dlamini, loyi sweswi a nga mukhomi wa nkwama wa nhlangano.

Dlamini loyi hi tlhelo a nga xirho tlhelo puresidende wa Mangombe Chamber of Commerce and Industry (MCCI) u xiximiwile hi sagwadi ra Paul Harris Fellow Recognition, rin’wana ra masagwadi ya xiyimo xa le henhla swinene leri nyikiwaka hi va Rotary International. Sagwadi leri ri nyikiwa eka vanhu lava hoxeke xandla swinene eka matshalatshala yo pfuna vaaki, vukorhokeri na ku nyikela vaaki.

Dlamini loyi a nga n’wamabindzu na ku va n’watikhemisi u vuriwa kuva a endlile swo tala a endlela vaaki va le Giyani, ngopfu-ngopfu eka timhaka ta rihanyo kusukela hi malembe ya vo 1980. Tanihi n’watikhemisi, Dlamini u tinyiketerile ku tlakusa vantshwa hi ku va nyika vuleteri bya vapfuni va van’watikhemisi na ku nyika nkateko wo dyondza ntirho eka lava dyondzelaka kuva van’watikhemisi.

Hi ku famba ka malembe, u leterile kwalomu ka 500 wa swichudeni, hi ku swi nyika vuswikoti bya nkoka na ku swi pfulela tindlela ta nkoka ku kuma mikateko ya mitirho. Vo tala ka Khale ka vanhu lava a va leteleke va kotile ku tiakela matimu eka swiyenge swa tikhemisi na swin’wana swiyenge, leswi ku nga vumbhoni bya ku tinyiketela ka yena eka ku dyondzisa na ku hluvukisa vaaki.

Loko a langutisa lomu a humaka kona, Dlamini u kombisile ku khensa eka xiave lexi a koteke ku xi endla, hi ku tiyisisa nkoka wo tiyisela na ku tinyiketela ku tlakusa van’wana. U angarhelile ku humelela evuton’wini bya yena hi marito ya nhlohlotelo ya Martin Luther King Jr lawa ya nge “loko u nga endli swilo leswikulu, u nga endla swilo leswitsongo hi ndlela leyikulu.”

U kombisile ku khensa eka va Giyani Rotary Club kuva va tekerile enhlokweni ku hoxa xiave ka yena, laha a vuleke leswaku ku tekeriwa enhlokweni hi ndlela leyi, i xitsundzuxo xa nkoka wo nyikela eka vaaki. Ntirho lowu a wu katekisiwile hi vukona bya vanhu vo hlonipheka lava katsaka van’wamabindzu Errol Maluleke na Akani Baloyi kusuka eka MCCI, na van’wana vo tala lava katsaka khale ka puresidende wa Giyani Rotary Club Meehleketo Khosa.

Kasi nhlangano wa Giyani Rotary Club, lowu sunguriweke hi lembe ra 1989, wu tlangile xiphemu xa nkoka eka nhluvukiso wa vaaki. Wu tumbuluxile Irish House eGiyani, ndhawu leyi endleriweke ku hlayisa vana lava pfumalaka vatswari, naswona wu tlhele wu endla tiphurojeke to hambana-hambana ku katsa na ku aka ndhawu leyi hlayisaka vadyuharie Giyani.

Emasunguleni nhlangano lowu a wu ri na vanhu va nhlonghe yo hambana-hambana, kambe enkarhini wa sweswi wu taleriwile hi vanhu va nhlonghe ya ntima lava ku nga swirho swa nhlangano, naswona ku ya hi puresidende wa nhlangano enkarhini wa sweswi Silence Makhubele, nhlangano wa ha tinyiketerile eka xikongomelo xa wona xo seketela vaaki.

“Giyani Rotary Club ya ha ri rivoningo ra ku tshemba na vukorhokeri eka vaaki. Ndzi ta tiyisisa leswaku xikongomelo xa nhlangano xo tlakusa vutomi bya vaaki xi ya emahlweni ku ya eka rixaka leritaka,” ku vula Makhubele, loyi a nga hlambanya ku yisa emahlweni matimu ya nhlangano na ku letela nhlangano ku ya eka ndlela leyinene, ku fana na leswi swi endliweke hi khale ka tipuresidende ta nhlangano.