MEYARA A NYIKELA EKAYA
Orlando Chauke
Meyara wa masipala wa Giyani, Thandi Zitha a endzerile xikolo xa phurayimari lexi a ngheneke eka xona loko a ha ri ndzumulo ku ya nyikela hi titanghu na ku khensa vadyondzisi eka xiave xa vona xo n’wi endla leswi a nga xiswona namuntlha.
Xikolo xa phurayimari xa Muswanama, hi xona xikolo xa khale emugangeni wa ka Maphata, naswona i khale xi nyika vukorhokeri bya dyondzo eka vaaki endhawini liya. Meyara u endzerile xikolo ku ya nyikela hi yexe titanghu ta 88 ta xikolo eka vadyondzi lava sweleke
Loko a vulavula hi nkarhi wa ntirho, u kombisile xiphemu lexi xikolo xi xi tlangeke eka ku aka vutomi bya yena, ngopfu-ngopfu hi nkarhi lowu a tikeriwa hi ku vona ndlela. U kombisile ku khensa swinene eka vadyondzisi lava n’wi leteleke leswaku a va leswi a nga xiswonanamuntlha.
“Ndzi fanele ku amukela leswaku a ndzi nga tikhomangi kahle tanihi n’wana; a ndzi tshamela ro phunghela, kambe mi ndzi lulamisile, hambileswi a hi ehleketa leswaku a mi hi khomile hi voko ra nsimbhi hi nkarhi wa kona, sweswi ndza switwisisa leswaku mi endlile ntirho wa kahle swinene ku ndzi endla leswi ndzi nga xiswona namuntlha,” wa hlamusela a khensa ndzima leyi tlangiweke hi vadyondzisi.
U tiyisisile nkoka wa dyondzo eka ku cinca vutomi na ku humesela erivaleni xivono xa yena xa leswaku muganga wu ya emahlweni. U kombisile nkoka wa ku nyikela vaaki lomu vanhu va humaka kona loko va humelerile.
“Loko xiboho xo nyikela titanghu leti xi ta emiehleketweni ya mina, xikongomelo xa mina a xi ri eka miganga ya laha ndzi humaka kona. I ku navel aka mina ku vona muganga wa mina wu ya emahlweni. Ndza swi navela ku vona patu leri sukaka eka Maphata ku ya eka Makhuva ri hela hi nkarhi wa mina, leswaku loko nkarhi wa mina wu fika emakumu, ndzi ta swi tiva leswa ndzi fikelerile swin’wana.”
Pfhumba leri i ku yisa emahlweni ku tinyiketela ka yena eka matshalatshala yo nyikela eka miganga leyi tekeke xiave eka ku kula ka yena. Meyara u vule leswaku u tshembha swinene nkoka wo vekisa eka vantshwa ku tiyisisa leswaku va va na nkateko wa kahle ku tlula hi nkarhi wa yena.
U kombisile leswaku swihanano leswi a swi kongomisiwile eka ku nyika nseketelo wa nkoka eka vadyondzi lava sweleke hi ku lulamisa swirhalanganyi eka dyondzo, swo fana na ku pfumala titanghu, ntlhotlho lowu a vulaka leswaku wu herisa ntshembho eka vadyondzi. Loko a vulavula hi ku yimela vatswari na vaaki emugangeni lowu, Ndhuna Maphata u amukerile ku tundzukiwa hi meyara laha a nga khensa ku tinyiketela ka meyara eka vutomI bya vana. “Swihanano leswi swi ta hlohlotela vadyondzi swinene. Tanihi muganga, hi rhandza ku khensa na ku kombisa ku tsaka eka leswi mi hi endleleke swona.”
