Gwambe Yi Pfumala Nkateko Wo Rhanga

Themba Chauke

Xipano xa bolo ya milenge xa Gwambe Hungry Lions kusuka emugangeni wa ka Muyexe, xi vile na gome endzhaku ko tlanga kuringana (0-0) na xipano xa Mnginginisi Mighty Stars eka ntlango wa nkoka eka swipano leswi hinkwaswo. Hambileswi ntlango lowu a wu ri wa nkoka na le ka xipano xa Mninginisi Mighty Stars, a ku
languteriwile leswaku ku ta va ndlela yo rhanga ya xipano xa Hungry Lions, tanihileswi kuhlula ka xona a ku ta xi veka emaninginingini ya Ligi ya Local Football Association (LFA).

Leswi a swi ta veka xipano eka xiyimo xa kahle xo tlakusiwa ku ya eka ligi yo hlawuleka ya Castle, leswi ku nga mabulandlela ya swipano leswi swi lavaka ku fikelela swiyimo swa le henhla swa ntlango wa bolo ya milenge etikweni. Ligi ya Castle yi na nkoka swinene, yi pfula tindlela eka swipano ku fikelela ku ya tlanga eka Ligi ya ABC Motsepe.

Ntlakuso wo ya eka Ligi ya ABC Motsepe a swo pfulela tindlela ta vaseketeri va swa timali ntsena, kambe swi pfula na tinyangwa ku tekeriwa enhlokweni laha tikweni na ku kota ku tlakuka ku ya eka Ligi ya le henhla.

Eka swipano swo fana na Gwambe Hungry Lions, ku fikelela swiyenge leswi i norho lowu kombisaka ku humelela eka mitlangu na ku tinyungubyisa emugangeni wa ka vona. Kasi ku tlanga ku ringana emahlweni ka vaseketeri va le kaya swi va tshovile timbilu swinene. Leswi swi endlile leswaku va lahlekeriwa hi mikutlunya ya nkoka leyi a yi ta endla leswaku va tikuma va ri emanembenembeni ya ligi.

Loko ka ha sarile mitlangu yi ntsongo, ntshikelelo wu le henhla ka vona leswaku va fanele ku hlula eka mitlangu leyi yi landzelaka loko va ha lava ku tlakusiwa. Kasi hi hala tlhelo, un’wana wa vadzaberi va xipano xa Gwambe, Freedom Nyathi, u kombisile ku khomiwa hi tingana hikokwalaho ko tlanga ku ringana na xipano xa Mninginisi Mighty Stars, lava sweswi va nga le ka xiyimo xo sungula, kambe a vula leswaku xipano xa yena xi tlangile hi mbilu na moya.

“Hi tlangile hi matimba; a hi hluleka laha na lahaya. Xin’wana lexi endleke leswaku ntlango wu hi tikela swinene i mhaka ya leswaku xipano lexi a hi tlanga na xona xi tile xi tilulamisile swinene, a xi lava ku kuma mikutlunya hi tindlela hinkwato,” wa hlamusela laha a nga tshikelela leswaku va tlangile kahle.

“Xivilelo xa hina hi leswaku ku tlanga ku ringana eka ntlango lowu swi hi siverile nkateko wo ya eka xiyimo xo sungula, Ehandle ka sweswo, ntlango a wu ri kahle swinene. Lexi hi faneleke ku xi antswisa tanihi xipano i ku tiyisisa vatlangi va le ndzhaku hikuva hi laha a hi kayivela kona. Loko hi hlasela hi ya emahlweni, a hi nonoka loko hi fanele ku sirhelela, naswona leswi a swi ta endla leswaku hi hluriwa,” wa hlamusela.

Hambiswiritano, gondzo ro tlakusiwa ku ya eka Ligi ya Castle ra ha ri kusuhi eka xipano xa Gwambe Hungry Lions, kambe sweswi swi ta lava leswaku xi tiyimisela xi va na miehleketo yo lava ku hlula eka ntlango wun’wana na wun’wana lowu va wu tlangaka ku ya emahlweni.