Meyara A Khoma Mindyangu Xikatla

Orlando Chauke

Meyara wa masipala wa Giyani Thandi Zitha, u komberile vaaki va le mugangeni wa ka Shikhumbha ku seketela mindyangu yi mbirhi, leyi yi nga weriwa hi khombo ra rifu eka ntirho wa nkosi lowu a wu khomiwile hi nkarhi wun’we wa vantshwa va mbirhi lava va hundzeke emisaveni eka nghozi ya movha. Swiviko swi kombisa leswaku Baloyi Morgan wa melmbe ya 23 na Muvi Benjamin wa malembe ya 33, a va ri endleleni yo vuyela ekaya kusuka eka ntlango wa mphikizano wa bolo ya milenge lowu a wu khomeriwile emugangeni wa ka Nsavulani loko movha lowu a va famba hi wona wu khumbhekile eka nghozi ya movha leyi nga koxa vutomi bya vona.

Ku hundza emisaveni ka vantshwa lava va mbirhi swi chavisile muganga, ngopfu-ngopfu exikarhi ka varhandzi va ntlango wa bolo ya milenge, lava va hlamuselaka vantshwa lava tanihi vaseketeri va nkhikhi wa ntlango. Va yile ku ya vona ntlango va nga swi tivi leswaku i siku ra vona ro hetelela.

Loko a vulavula hi nkarhi wa nkosi, Meyara Zitha, u hlohloterile vaaki ku va nyandza yin’we na ku khoma xikatla mindyangu leyi yi nga le ku rileni. U vurile leswaku nseketelo wa vaaki wu nga tlanga xiave xa nkoka eka ku pfuna mindyangu ku hundza eka xiyimo lexi xo vava xa ku lahlekeriwa, tanihileswi swi nga oloviki ku hundza eka xiyimo xa muxaka lowu.

“Ku lahlekeriwa hi n’wana a swi toloveleki, ngopfu-ngopfu loko u va vonile nimixo, u vulavula na vona u va vona va huma va famba ku ya tiphina hi nchumo wo olova wo fana na ntlango wa bolo ya milenge. U tshamile ekaya, u languterile ku va vona nakambe nimadyambu tanihi ntolovelo, ntsena ku fika ka un’wana na mahungu yo vava swinene ya leswaku n’wana wa wena u hundzile emisaveni,” meyara u byela vayoweri.

Meyara u vurile leswaku gome ra muxaka lowu ra vava swinene, naswona ri ta tshama nkarhi wo leha eka mindyangu ya vaferiwa. “A ndzi nge tiendlisi ndzi vula leswaku swilo sw ta antswa ku nga ri khale, ku hola swi ta teka nkarhi,” u ya emahlweni laha a vuleke leswaku kuhava marito yo tala lawa ya nga va horisaka tanihileswi rifu ku nga nchumo lowu tiviwaka hi Xikwembu.

“Hambiloko mo ya ekerekeni mi ya kombela swikhongelo, swa endleka na swona swi nga pfuni. I ntsena Xikwembu, hi nkarhi wa Xona, lexi Xi nga ta horisa timbilu ta n’wina,” wa hlamusela.

U komberile vanhu lava va nga le kusuhi na mindyangu leyi yi mbirhi ku va pfuna leswaku va hatlisa va hola. “Gome leri a ri nge pimiwi hi tin’hweti, swi nga ha teka malembe leswaku ntiko lowu wu ya ehansi; hikokwalaho swi na nkoka leswaku lava va nga le kusuhi na mindyangu leyi yi mbhirhi va tshunela kusuhi na mindyangu leyi, mi nyika vukona bya n’wina xikan’we na ku va pfuna ku hola hi tindlela hinkwato leti mi nga ti nyikaka.”

Meyara u yile emahlweni a vula leswaku masipala wu hoxile xandla ku pfuneta eka migingiriko yo lulamisa timhaka ta nkosi eka mindyangu leyi yi mbirhi, tanihi ndlela yo pfuneta loko va kumile xikombelo kusuka eka mindyangu leyi.