Meyara A Endzela Ndyangu wa Mufi

Hi Mkateko Ndlovu

Meyara wa Masipala wa Collins Chabane Shadrack Maluleke, u endzerile vandyangu lowu weriweke hi papa ra ntima, endzhaku ka swiviko leswi a swi tele eka swiyenge swa mabulo na ku hlundzuka ka vaaki mayelana na ku dlayiwa hi tihanyi ka Khazamula Ronald Mabasa loyi a dlayiweke ekaya ra yena eka Muganga wa Gumbani ehandle ka doroba ra ka Malamulele endzhaku ka loko a kumile mali ya yena ya mpfuneto.

Mukhalabya loyi u kumiwile hi siku leri ri landzelaka a hundzile emisaveni hi swirho swa ndyangu wa ka vona. Hi nkarhi wa rendzo ra yena, Meyara Maluleke u hundziserile marito yo chavelela eka ndyangu wa ka Mabasa na vaaki hinkwavo va muganga wa le Gumbani naswona u tlherile a hlohlotela vukorhokeri bya maphorisa ya Afrika-Dzonga ku hatlisisa vulavisisi bya vona eka nandzu lowu.

Kasi hi nkarhi lowu fanaka u komberile vaaki kuva valweri vo sungula va vadyuhari. ‘’I swiendlo swo bola ku xanisa vaaki lava dyuhaleke naswona swi fanele ku fika emakumu. A hi nge tiyiseli mahanyelo lawa yo chavisa eka miganga ya hina no endla leswaku vadyuhari va hanya hi ku chava ngopfu-ngopfu vanhu lava va nga kotiki ku tisirhelela. Hi ta ringeta hi tindlela hinkwato ku susumeta vaxiphorisa leswaku va khoma vaehleketeleriwa va mhangu leyi naswona hi tshemba leswaku voko ra vululami ri ta hlula,” ku vula Meyara Maluleke.