Xikolo xa Tindzumulo xi Khensa Vatswari

Hi: Tracy Novela

“Ku hlayisa vana swi na nkoka swinene, naswona i mfanelo leyikulu kuva vana va kumeka va ri ka rhi va hlayisiwa hi ndlela ya xiyimo xa le henhla na kuva va Kuma tidyondzo letinene hambi va ha ri lavantsongo,” lawa i marito ya ku huma eka mufambisi Kumbe nhloko ya xikolo xa ti ndzumulo manana Emmah Novela.

Madumelani Early Learning Centre i xikolo xa tindzumulo lexi kumekaka emugangeni wa ka Mbatlo ehansi ka doroba ra Giyani. Madumelani yi amukela na ku hlayisa vana lava va nga le hansi ka tin’hweti ti nharhu ku ya fika eka mune wa malembe laha vana va sukaka va ya dyondza ephurayimari ku ya endla ti dyondzo ta masungulo laha swi endlaka leswaku vana va va na masungulo ya kahle ya dyondzo.

Loko vana va amukeriwa exikolweni xa Madumelani, va kumeka va hlayisiwa swinene, naswona ku na tidyondzo to hambana-hambana leti va dyondzisiwaka tona, naswona xikolo lexi xi le ka migingiriko yo hambana-hambana leyi katsaka swa mitlangu ya bolo ya milenge, ndzhavuko, na vuyimbeleri.

Xikolo lexi xi le hansi ka miseketelo yo fana na ya Pfumako laha va endlaka swin’we migingiriko yo hambana-hambana. Madumelani Early Learning Centre yi kumile miseketelo yo hambana-hambana kusuka eka mfumo laha swi endlaka leswaku xi phakela dyondzo ya kahle eka vana, naswona va vukosi bya ka Mbatlo va komba nseketelo lowunene leswi swi endlaka leswaku vana va Kuma dyondzo ya kahle.

“Hina hi tiyimiserile ku hlayisa vana laha hi kombelaka vatswari ku hi tshunelela leswaku vana va Kota ku Kuma dyondzo ya kahle, naswona hi khensa swinene nseketelo lowu hi wu Kumaka eka vatswari va ka Mbatlo wa ku hi nyika vana hi tshama na vona hi va kurisa hi va hlayisa laha minkarhi yin’wana swi nga oloveki eka vatswari kambe va hi rhandza hi ku hi nyika vana hi tshama na vona ha swi khensa sweswo,” manana Novela wa Hlamusela.

“Hi seketela mapfhumba hinkwawo lawa ya tisiwaka hi mfumo ya ku seketela dyondzo ya vana leswaku ku va na ku humelela na kuva vana va kumeka va hlayisekile.  Loko hi dyondzisa vana hi landzelerisa leswi ndzawulo yi lavaka swona laha hi kombelaka vatswari va muganga wa ka Mbatlo ku tisa vana va vona leswaku va ta Kuma dyondzo leyinene,” ku gimeta nhloko ya xikolo manana Novela.