Qambhi ya Xidyondzeki

“Vunanga i nchumo lowu wu nga le ngatini ya mina, naswona hi nkarhi lowu ndzi nga ri ku na ntirho wo Tala wa mina wo tihanyisa hi wona ndzi kumeka ndzi ri eka migingiriko ya vunanga bya mina bya xitsonga ku nyanyula vaseketeri va mina,” lawa i marito yo Huma Eka Sundhuza Mzamani loyi a tivekaka tanihi Meshack Mzamani Mathonsi.

Sundhuza Mzamani Mathonsi u velekiwile emugangeni wa ka Mbatlo ehandlenyana ka doroba ra Giyani kwala xifundzheninkulu xa Limpopo, kambe sweswi u kumeka emugangeni wa ka Xikukwani. Sundhuza i n’wana wa vu mbirhi wa Richard Maphangi Mathonsi na Solani Esther Novela. U pasile tidyondzo ta yena exikolweni xa le henhla xa Dumazi, hi lembe ra 2004, laha a nga yisa tidyondzo ta yena emahlweni eyunivhesiti ya Venda laha a nga pasa hi lembe ra 2010.

A nga helelangi kwalano, u tlherile a yisa tidyondzo ta yena emahlweni eyunivhesiti ya Sefako Makgatho laha a nga thwasela tidyondzo ta masters hi lembe ra 2024.

Rirhandzu ra yena ra swa vuyimbeleri ri sungurile a ha ri ntsongo laha a yimbelela a ri na kwalomu ka khume mune wa malembe, naswona u kule a yimbelela tinghoma ta va Dok Joe Shirimani, Penny Penny na va Umanji laha a nga tlhela a tiyisiwa hi malume wa yena kumbe tatana wa yena Makumbila kusuka emugangeni wa ka Mininghinisi Block 3.

“Mina ndzi sungurile ku endla nkhandziyiso wa alibamu ya mina yo sungula hi n’hweti ya Dzivamsoko hi lembe ra 2010, leyi nga vitaniwa KU TSWALA VOL 1, leyi yi nga humesiwa hi paseka 2018,” ku hlamusela Sundhuza.

“Ndzi na ti alibamu ta nkombo leti ti nga vitaniwa Vito ra mina ti tlhela ti humelerisiwa hi Marontlonsi laha alibamu yo hetelela yi nga humelerisiwa hi DJ Gift. Naswona ku na ti tinghoma ti mbirhi leti ti nga Huma leti vitaniwaka U FELE KU PFUNA na NDZI RHANDZILE WENA kusuka Eka vuhumelerisi bya Ngonjo leti ti nga ta Huma hi ku hetiseka hi n’hweti ya Khotavuxika 2025.

Vunanga bya Sundhuza byi humelerisiwa hi xitsonga xo hlatsweka laha byi tlangiwaka eka miganga na le ka swiyanimoya swa vaaki ku katsa na Munghana Lonene FM, naswona vunanga byi Kona na le ka online. “Loko munhu a ri eka vunanga lebyi swa ndzi tikela ku byi navetisa tanihiloko ndzi kumeka exifundzheninkulu xa Kwazulu Natal hikokwalaho ka ntirho, tanihileswi vanhu lava ndzi tshamaka na vona va vulavulaka ririmi ra Xizulu, naswona a ndzi se tshama ndzi bukiwa ku ya Chaya Eka mitirho ya vona.” U ya emahlweni

“Ndzi nghenelerile tidyondzo ta vunanga hi ku seketeriwa hi SAMRO hi xikongomelo xo tsarisela vunanga bya mina eka swiyimbeleri swa xitsonga leswi swa ha taka laha ndzi nga ta nghenela Eka mafambiselo ya swa vuyimbeleri, ku nghenisa vunanga online, ku tsala tinghoma na swin’wana swo tala,” wa gimeta.