Xifundzhakulu Xi Tsaka Hi Vuhlayiseka Bya Paseka

Hi Themba Chauke

Xifundzhankulu xa Limpopo xi tsakisiwile na ku khensa vaendzi hinkwavo lava va endzeleke xifundzhankulu hi mikarhi ya Paseka; magayisa lawa a ya vuyile ku ta vona maxaka na vanghana xikan’we na vakhongeri lava a va yile etindhawini ta vukhongeri to hambana-hambana, tanihileswi va xiximeke milawu ya le magondzweni.

Holobyenkulu wa xifundzhankulu Dokodela Phophi Ramathuba u vurile leswaku xifundzhakulu xa tsaka ku tivisa leswaku matshalatshala ya ntirhisano yo tiyisisa vuhlayiseki emagondzweni ya tswarile mihandzu leyi yi tiyisaka nhlana, laha ku veke na tinghozi ta le hansi ngopfu-ngopfu egondzweni ra N1 leri ri veke na nkhuluko wa le henhla wa timovha kusukela hi Wavumune ku fika Sonto wa mehelo ya vhiki ya Paseka.

“Hi khensa ntirhisano lowu veke kona wa huvo na swirho swa xifundzhankulu, timeyara na tikhaselara lava va endleke leswaku mapfhumba ya vuhlayiseki bya le magondzweni i vutihlamuleri bya vona,” ku hlamusela Holobyenkulu loyi a vuleke leswaku u khensa maphorisa ya tiko na maphorisa ya le magondzweni, va swilamulelamhangu na van’wana vatirhi lava va tirheke hi matimba ku vona leswaku ku va na vuhlayiseki emagondzweni.

“Ku tinyiketela ka vona eka ku tiyisisa milawu ya le magondzweni, ku katsa na ku khomiwa ka vanhu lava a va chayela va byi dyile na ku chayela hi rivilo ra le henhla, swi rhumela hungu ra leswaku mahenyelo yo ka ya nga ri kahle a ma nge pfumeleriwi,” Dkd Ramathuba u ya emahlweni.

“Tanihileswi hi languteleke nkarhi wun’wana wo famba-famba, ku katsa na masiku yo wisa, hi mahelo ya n’wheti ya Dzivamusoko, hi kombela vatirhisi va magondzo ku ya emahlweni va rhangisa vuhlayiseki bya le magondzweni, Dkd Ramathuba wa gimeta.

Kasi Holobye wa ndzawulo ya Vutleketli Barbara Creecy, u vurile leswaku a ku va nga na rifu ni rin’we leri ri mangariwa egondzwemi ra N1 hi mahelo ya vhiki yo leha ya paseka. Holobye u vurile leswaku leswi i Mbuyelo wa ku thola maphorisa ya le magondzweni leswi swi antswisaka vuhlayiseki bya le Magondzweni.

Hambiswiritano ku vuriwa leswaku muchayeri u khomiwile eMokopane kusuhi na le Polokwane endzhaku ko ringeta ku ba mati tingwenya ti etlela loko a ta va a kumiwile a chayela a byi dyile.