Meyara a Tlangela Siku hi ku Nyikela

Hi MKATEKO NDLOVU

Hi siku ra ti 15 Dzivamusoko 2025 meyara wa masipala wa Collins Chabane muchaviseki Shadrack Maluleke, a tlangela siku ra yena ra ku velekiwa. Meyara u  tekile goza ro tlangela siku ra yena na vana va xikolo lava va humaka eka mindyangu leyi yi sweleke ni va tsoniwa.

Ehandle ka ku nghena eka switolo swa manyunyu a dya swakudya swa mixavo ya le henhla, Meyara Maluleke u hlawurile ku yisa ntsako a tlangela siku ra yena ro velekiwa na vanhu lava hanyaka na vutsoniwa, vaaki ku suka emugangeni wa ka vona ni vana va xikolo lava humaka eka mindyangu leyi pfumalaka.

Tanihi xiphemu xo tlangela Siku ra yena ro velekiwa, Meyara Maluleke u nyikile switulu swi mbirhi swa mavhilwa eka vanhu lava hanyaka na vutsoniwa kusuka emugangeni wa ka Madobi na Maphophe naswona u tlherile a nyikela hi titanghu ta xikolo eka swikolo swa Khume-Mbirhi kusuka eka Malamulele, Vuwani, Hlanganani
na Saselamani.

“Ndzi tekile xiboho xo endzela miganga leyi lembe leri ku ta cinca vutomi bya vanhu va mina. Ndzi lava leswaku nkhuvo wa siku ra ku velekiwa ka mina wu khumba vutomi bya vanhu lava tshamaka emigangeni yo hambana-hambana ya Collins Chabane, ku nyikela vanhu lava hanyaka na vutsoniwa switulu, titanghu ni swakudya
eka lava va sweleke i ndlela ya ku antswisa vutomi bya vona,” ku vula Meyara Maluleke.

Lava va mbirhi lava va hanyaka na vutsoniwa u amukerile Xitulu xinthswa xa Mavhilwa na khekhe tanihi nyiko ya siku ra ku velekiwa. Kasi vadyondzi va 120 va nyikiwile swiambalo swintshwa swa xikolo ni khekhe ra siku ra ku velekiwa. Meyara u gimetile siku ra yena hi ku nyikela swakudya emugangeni wa ka vona naswona u
tlherile a khutaza vaaki ku rhangisa minongonoko ya nhluvukiso wa vaaki leyi lavaka ku antswisa swiyimo swa vutomi bya vanhu hinkwavo.

Un’wana wa lava va nga nyikeriwa hi xitulu u nyikile matitwelo ya yena hi nkarhi wa rendzo ra meyara a hlamusela leswaku wa khensa swinene eka leswi meyara va n’wi nyikeleke hi swona kambe sweswi u kombela ku nyikiwa ntirho leswaku a ta fikelela leswi a swi navelaka, laha a nga ya emahlweni a kombisa leswaku loko munhu a
tirha wa rivala hi ku ehleketa hi swilo swo tala swo fana na vusiwana.

Hi hala tlhelo, vandyangu wa ka Baloyi na vona va tatile marito yo khensa eka meyara ku va a va nyikerile hi xitulu xa mavhilwa laha va kombiseke leswaku i khale va lava xitulu lexi kambe a va nga fikeleli hikokwalaho ka macheleni, sweswi va ta wisa ku tirhisa barha ku yisa murhandziwa wa vona exihambukelweni.