N’watipepe a Tlhoma Tihlo eka PSL

Hi Orlando Chauke

Eka malembe ya 38, Molly Chauke u kombisa leswaku rirhandzu ra ntlango wa bolo ya milenge a ri heli loko munhu a tshika ku tlanga ntlango lowu. Khale ka mutlangi wa xipano xa bolo ya milenge ya vaxisati xa Mninginisi Brave Ladies, xipano lexi xi tivekaka hi ku teka swidlodlo swo hlaya swa Mphikizano wa masipala wa Giyani lowu wu tivekaka hi Greater Giyani Mayor’s Cup. Enkarhini wa sweswi, Molly u tekile rin’wana goza eka ntlango lowu tanihi n’watipepe.

“Leswi swi sunguleke ntsena tanihi ku tlanga bolo ya milenge swi hundzukile ku tinyiketela ka le henhla,” wa hlamusela. “Loko nkarhi wa mina wu fika emakumu tanihi mutlangi, ndzi vonile leswaku a ndzi nga tiyimiselanga ku sukela ntlango lowu. Hi leswi swi endleke leswaku ndzi famba ndzi vutisisa leswaku munhu u fanele ku endla yini leswaku a va n’watipepe.” Hi ku tiyimisela, Molly u landzelerile switsundzuxo leswi a swi kumeke, a hetisisa swilaveko leswi swi lavekaka, kutani a amukeriwa tanihi n’watipepe.

Loko a hlamusela ntlango wakwe wo sungula tanihi n’watipepe u vurile leswaku a nga tirhanga kahle, kambe a nga pfumelelanga leswaku leswi swi n’wi heta matimba. “Ndzi dyondzile eka swihoxo swa mina ku ya emahlweni,” Tanihi wansati eka ntlango lowu wu taleriweke hi vaxinuna, Molly u hlamusela hi mitlhotlho leyi a hlanganaka na yona.

“Xiyimo xin’wana xo tika lexi ndzi hlanganeke na xona, hi loko ndzi boheka ku ya hlola mutlangi wa xinuna loyi a rahiwile emahosi hi nkarhi wa ntlango. A ndzi nga swi tivi leswaku ndzi fanele ku khoma xiyimo lexi hi ndlela yihi emasunguleni, kambe sweswi ndzi dyondzile leswaku ndzi fanele ku endla yini eka xiyimo xa muxaka lowu.”

Ehandle ka mitlhotlho leyi, u vurile leswaku leswi a swi tokoteke i swa kahle. “A ndzi se tshama ndzi biwa kumbe ku hlaseriwa hi vatlangi. Va hlonipha swiboho leswi ndzi swi tekaka, naswona ndzi ringeta hi matimba leswaku swiboho leswi ndzi swi tekaka a swi voyameli etlhelo rin’we.” U yile emahlweni a vula leswaku hambi a endla swihoxo, kufana na van’watipepe hinkwavo lava va tshamelaka ku endla swihoxo, vanhu va fanele ku twisisa leswaku van’watipepe na vona i vanhu,

Eka vavasati lava va navelaka ku nghenelela eka migingiriko ya van’watipepe, Molly u nyikile Marito ya nhlohlotelo, laha a vuleke leswaku kuhava xo chavisa. “Mi nga chavisiwi hi kuva ku tele vavanuna kumbe ku hlaseriwa. Kuhava mutlangi loyi a nga ta ku ba loko u tirha hi ndlela leyi yi nga voyameriki etlhelo rin’we na ku tirha hi ku hetiseka,” u ya emahlweni.

Enkarhini wa sweswi u endla migingiriko ya yena eka ligi ya Giyani Local Football Association, naswona u tlhomile tihlo eka vumundzuku bya le henhla. “Ndzi le ku tirheni hi matimba ku tlakusa vuswikoti bya mina, naswona ndzi na ku tshembha leswaku eka rin’wana ra masiku ndzi ta teka xiave eka Ligi ya PSL. Ndzi tshembha leswaku tinyangwa ti ta ndzi pfulekela loko ndzi tirha hi matimba.”

Rendzo ra Molly kusuka eka ku va mutlangi ku ya eka ku va n’watipepe i swa le henhla. I hungu ra matimba eka vavasati hinkwavo ra leswaku ntlango wa bolo ya milenge wu na ndhawu eka munhu un’wana na un’wana, swi nga ri na mhaka leswaku u hlawula ku teka xiphemu xihi. “U fanele ku endla leswi u tshembhaka leswaku wa swi kota,” wa gimeta.