Meyara a Chavelela Vandyangu wa Mufi

Hi Mkateko Ndlovu

Meyara wa masipala wa Collins Chabane muchaviseki Shardrack Maluleke u yisile marito yo chavelela eka ndyangu wa ka Mabuyangwa emugangeni wa ka Xitlhelani endzhaku ka ku dlawa ka n’wana wa vona wa jaha loyi a tlhaveteriweke hi nkarhi lowu a tshamile ni vanghana va yena.

Meyara Maluleke, u nyikile marito yo chavelela eka ndyangu wa ka Mabuyangwa. Laha a nga humesa matitwelo ya yena. ‘’Ndlela leyi yo chavisa ya ku dlawa ka vanhu yi fanele ku hlangana na switandzhaku swo tika. Ndzi veka leswi erivaleni ehandle ka ku kanakana. Ndzi lahlekeriwe hi marito ku hlamusela mhangu leyi hi ndlela leyi yi chavisaka xiswona.

Maphorisa ya Afrika-Dzonga ma fanele ku hatlisa ku tiyisisa leswaku vaendli va vugevenga va yisiwa ehubyeni no pfaleriwa hikuva a va fanelanga ku tshama emigangeni ya hina’’. ku vula Meyara Maluleke.

Manana wa jaha leri dlaweke u tshekelelekile swinene hikokwalaho ka mhangu leyi. Kasi vurhangeri bya swifambo swa mani na mani swa DO LIGHT va nyikerile ndyangu lowu hi homu, mati, na bazi ku lulamisa nkosi. Meyara Maluleke a heleketiwile hi Ximokonkulu xa Masipala mukhaselara Erick Baloyi, mukhaselara wa Wadi 24, Swirho swa vurhangeri bya Masipala, Dokodela Prince Gulunkulu wa Contralesa Vhembe, na Matsalana wa Contralesa hosi Xigamani.